Balabag sa bag-ong terminal building sa Mactan airport

Nabati-an na sa mga tagdumala sa Mactan Cebu International Airport Authority (MCIAA) unsa diay ka-importante ang dakbayan sa Lapulapu sa "existence" nianang airport.

Karon nga buot sa MCIAA nga masugdan pagtukod ang P5.8 bilyones nga airport terminal, nalangay hinuon kini og samot sa dihang nangita ang Regional Development Council sa endorsement sa lokal nga kagamhanan sa Lapulapu.

Daghan sa mga sakop sa RDC-Infrastructure Development Committee nga nasagmuyo kang Mayor Paz Radaza tungod sa matud pa paglangaylangay niya og endorse sa proyekto, bisan ang PPP ni Pres. Noynoy Aquino human na miduso sa proyekto.

Si Bobit Avila, private sector representative sa RDC-IDC kang kansang chairman mao si Manny Rabacal, mipagawas og opinyon sa isyu. Matud niya dili na kinahanglan ang endorsement sa dakbayan tungod kay ang Mactan Cebu International Airport usa ka government-owned corporation.

Apan para nako, bisan pa og wala kinahanglana ang pagduso sa lokal nga kagamhanan, kinahanglan gihapon kita mananghid.

Bisan tuod og government instrumentality ang MCIA, ang lokal nga gobyerno sa Lapulapu kinahanglan gihapon motan-aw sa tukorong bag-ong proyekto tungod sa katungod niini nga mobuhis og real estate tax nianang bag-ong estraktura, sumala sa gimbut-an sa Local Government Code. Sa laktod, kinahanglan malili sa mga lokal nga opisyal kanang bag-ong terminal sa airport aron mahibaw-an (assess) pila ang ibuhis.

Unsa kahay intensiyon ni Radaza nganong wala man dayon siya moduso sa maong bag-ong proyekto sa airport?

Sa akong tan-aw, igo lang tingaleng ipakita ni Mayor Radaza nga dili diay angay tando-tanduon ug unya-unyaon lang ang kagamhanang lokal sa Lapulapu sa gipaningil niini nga real estate tax nga sa akong nahibaw-an mikabat na og P2 bilyones.

Sukad pa kaniadto nangayo ang Lapulapu sa maong realty tax, apan gipaminaw ba gud sila sa hunta direktiba sa MCIAA? Kanunay lang intawon gi-isnab sa MCIAA board ang siyudad sa Lapulapu, bisan na lang og data-data, wala gyud!

Mga 20 porsiyento sa kita-on sa usa ka lokal nga kagamhanan gikan sa real estate tax maadto sa Special Education Fund (SEF).

Unsa man ning SEF? Pundo kini nga kuhaan sa mga gastohan sa lokal nga kagamhanan alang sa programa sa edukasyon. Pananglit isuweldo sa kulang nga mga magtutudlo ug ipapanday og bag-ong mga classroom.

Nakahunahuna kaha ang MCIAA board aning puntoha?

Dihay report nga nagkanayon nga ang Lapulapu city nagkulang og 500 ka mga classroom.

Kun mobayad lang ang MCIAA bisan katunga lang anang P2 bilyones nga utang niini sa dakbayan sa Lapulapu, pila ka mga tinun-an ang mabulahan kun matukod na bisan katunga lang anang 500 ka mga classroom nga kulang sa Lapulapu?

Dili ko motuo nga kanang gihimo ni Mayor Radaza usa ka pagbabag nga walay rason. Tingale, gipaabot lang sa mayor ngadto sa MCIAA nga maayong magkasinabot ang siyudad sa Lapulapu ug ang tagdumala sa airport.

Ang Lapulapu usa ka siyudad nga nabuhi sa turismo. Busa, nasayod si Mayor Radaza nga kun mobabag siya sa katukoran sa bag-ong terminal, apektado ang turismo, apektado ang Lapulapu.

Turismo gani ang gisaligan sa usa ka dakbayan, kinahanglan kini og nindot ug world-class nga airport.

Pero, por dios, tagda sab intawon ang panginahanglanon sa mga lumolupyo palibot nianang airport, pinaagi sa pagbayad sa buhis nga angay sa katawhan.

Ang gipangayo sa mayor dili alang kaniya, kun dili alang sa mga residenteng iyang gi-alagaran.

Maayong masayod ang RDC nga ang babag sa katukoran nianang airport terminal building dili si Mayor Paz Radaza, kun dili ang katawhan mismo sa Lapulapu nga gi-utangan og buhis, gi-isnab ug gi-unya-unya lang sa MCIAA board sulod sa dugay nang panahon.