EDITORYAL - Problema bahin sa classroom kanunay

Ang suliran bahin sa kakuwang sa mga edipisyo sa eskuylahan ug sa mga lawak klasehanan di baya sulbaronon lang sa departamento sa edukasyon.

Una sa tanan ang angay manguna sa paghatag og solusyon sa maong problema mao ang mga opisyal sa barangay diin natarok ang usa ka institusyon sa eskuylahan.

Di angay magtanga ang mga opisyal sa lugar nga may eskuylahan, kay una sa tanan magpasalamat mo nga di na moadto pa og layong suwad ang mga kabataan sa inyong barangay tungod kay ang DepEd naghatag og mga magtutudlo nga maoy motudlo kanila.

Ang problema sa edipisyo di ninyo angay idat-og nga solo ngadto sa DepEd ang pagsulbad niini .

Kamo mismong taga barangay ang manguna sa paghatag og solusyon niining maong problema kay para kini sa inyong mga kabataan.

Ang inyong buhaton mao ang pagpakig-alayon sa taga DepEd, mga   mayor sa lungsod o siyudad o kaha sa gobernador sa lalawigan ug sa kongresista sa inyong distrito, ug kun may amigo kamong mga senador mas labing maayo. Unya mopasar kamo og resolusyon alang sa mga hingtungdan, nga maghangyo nga magpatabang kamo aron masulbad ang inyong suliran bahin sa eskuylahan.

Nganong kada tuig mao may suliran sa matag eskuylahan ang kakuwang sa edipisyo o kaha classroom, kini tungod kay ang maong suliran wa hatagi og prayoridad sa mga opisyal sa barangay. Gipakagamay nila ang maong problema kay nagtuo sila nga katungdanan ra sa DepEd ang pagsulbad niini.

Dinhi mosipyat ang ubang mga opisyal sa lokal nga kagamhanan nga kuwang sa hustong paminsar kay nagtuga-tuga og pangatungdanan sa barangay, lungsod, siyudad o kaha lalawigan nga kuwang sa alamag bahin sa tukmang pangatungdanan sa kagamhanan.

Hunahunaa nga matag tuig nagkadaghan ang mga kabataan sa imong barangay ug usa sa imong iandam kanila kun husto ka og plano mao ang bahin sa ilang edukasyon. Di ba?