Mosaler kaha?

Pormal na nga nagsugod ang klase sa mga tulonghaan. Ug kalbaryo na usab sa mga ginikanan ang pagmata og sayo aron paghatod sa ilang mga anak ngadto sa mga tulonghaan. Alang sa mga kabataan, mapugos   na usab sila pagmata og sayo aron dili ma-late sa ilang klase.

Adunay dakong kausaban sa sistema sa edukasyon sa nasud sugod karong tuiga. Kini sa dihang gipatuman na sa kagamhanan ang K-12, ang bag-ong sistema diin gipun-an sa Department of Education og duha ka tuig ang high school.

Kining maong lakang gituyo sa kagamhanan aron makab-ot sa Pilipinas ang mas modernong sistema sa edukasyon. Pinaagi kuno sa K-12, nahisama na ang Pilipinas sa mga nasud nga naghatag og taas nga tuig pagtungha sa ilang mga estudiyante.

Sa wala pa ang maong bag-ong sistema, ang Pilipinas lamang kuno ang nasud tibuok kalibotan nga adunay pulo ka tuig nga sistema sa edukasyon sa elementary ug high school. Mao kini ang hinungdan ngano nga ubos ang pagtan-aw sa mga multinational companies sa mga propesyonal sa nasud.

Kun atong sabton, maayo kining mga lakang sa kagamhanan pag-isa sa kalidad sa sistema sa edukasyon sa nasud. Alang kini sa kaayohan sa mga estudyante aron makabaton sila og maayong edukasyon.

Apan, sa laing bahin, magduha-duha usab kita kun mosaler ba kining maong programa sa DepEd. Magsilbi kaha kini niining mga panahona nga mahal alang sa mga ginikanan ang pagpa-eskwela sa ilang mga anak?

Klarong daghan pang mga problema ang wala pa maatiman sa DepEd. Kini sama sa kakulangon sa mga magtutudlo, classroom ug mga materyales sama sa libro nga mas maoy gikinahanglan nga unahon sa maong departamento pagsulbad.

Wala man siguroy molalis sa maayong tumong sa gipatas-ang tuig sa sistema sa edukasyon. Dako gayud kini og ikatabang sa atong mga kabataan. Kini aron nga makab-ot sa nasud ang taas nga standard nga sistema aron nga makasabay kita sa kalibotanong kompetisyon.    

Apan ang pangutana kun unsa ka andam ang tanan niini. O kun mosaler ba kaha kini kay sa naandan nang sistema. Hinuon nagdepende ang kalamposan niini sa maayong dagan sa programa.