EDITORYAL - Kinsay sipyat, ang taga LTO o ang driver?

Gibalita nga nagkabangi ang   ahente sa LTO ug sa usa ka driver sa usa ka sakyanan kansang headlight   wa mosiga.

Unya ang driver sa sakyanan kinsa nasayud diay nga dauton ang iyang suga mao kunoy mimando sa taga LTO nga ipapukpok ang iyang suga aron mosiga.

Sa maong punto imbis mopukpok ang taga LTO sa suga , gipangayo hinuon ang lisensya sa driver hinungdan nga misamot kadako ang maong problema.

Kay usa ka naandang tahas sa taga LTO ang pagsusi sa lisensya sa usa ka driver nga nakalapas sa balaod sa trapiko, aron sutaon kun di ba   expire ang imong lisensya o kaha nag-drive ka ba nga may lisensya.

Ug ang di nimo pagtuman sa mando sa maong mga otoridad,   nagpasabot nga usa ka arogante ug labing makapatahap kanila kun may lisensya ka ba ug kun aduna man, di ba expire.

Para kanila bisan kinsa pa kang haria sa kalibotan kun molapas ka sa balaod , di mahimong hapin ang imong katungdanan aron di ka nila sitahon ug pahibaw-on sa imong sipyat, kay ila kanang katungdanan.

Kay kun edukado ka nga pagka-driver, aw kaantigo ka motahud sa mga otoridad nga nagbantay sa trapiko ug ang di nimo pagyukbo kanila nagpasabot lang sa imong pagka-abusado .

Nga sa samang higayon kun ikaw naghupot usab og dakong katungdanan, ug sa imong pagka-otoridad sa imong buhatan may mga tawo nga di motahod kanimo mongisi lang kaha ka ug malipay?

Busa ang pagtinahuray sa usa ug usa gikinahanglan kaayo, kay di mahimo nga kun hari ka sa imong dapit, hari ka usab sa laing dapit nga giharian na og lain.

Tungod kay ang laing dapit nga gawas sa imong hurisdiksyon may hari nga nagyaka niini, ikaw nga mosum-ok sa maong lugar usa ka ulipon ug ubos ka sa iyang gahum sa pagmando, busa katungdanan nimo ang pagtahud kaniya , ug di kay siya maoy imong patumanon sa imong gusto,

Kun ikaw maoy tua sa iyang sapatos, di ba abnormal kaayo kun mongisi lang ka? Di ba?