Timailhan

Nanumpa na sa hingpit si Gobernador Gwen Garcia isip sakop sa PDP-Laban, timailhan nga siya seryoso sa plano nga mopapili pagkasenador. Kun niadto gidudahan ang iyang plano tungod sa pagbalhin niya sa iyang registration gikan sa Dumanjug paingon sa Barili, karon posibleng hinayhinay na nga mapapas ang maong katahap.

Gipaabot na sab ang posible nga pagsaka sa iyang rating sa survey nunot sa maong kalamboan. Sa nangagi nga surveys gikatahong diha lang sa ika-45 si Garcia. Usa sa mga rason nganong mubo ang iyang rating tungod kay posibling giisip pa sa mga tawo nga dili siya seryoso nga mopapili sa nasudnon nga posisyon tungod sa rason nga wala siya’y national party. Tinuod kaalyado sila ni kanhi Presidente Gloria Macapagal Arroyo kaniadto apan sigun sa akong mahinumduman nibiya sila sa partido Lakas ug naghulma og lokal nga partido, ang One Cebu Party.

Sa miaging eleksiyon nakig-alyansa ang One Cebu sa Kampi ni Arroyo apan wala sila mopasakop. Karon nga mihurar si Garcia sa PDP dako ang kahigayonan nga mosaka ang iyang rating sanglit makatabang ang makinarya sa partido aron pagduso sa iyang kandidatura.

* * *

Sa pagsalga ni Garcia sa mas lapad nga bantawan sa politika, iyang ibilin ang lalawigan sa Sugbo sa iyang manghod.

Ang One Cebu Party mipahibawo na nga si Kongresista Pablo John Garcia maoy ilang kandidato. Sa ato pa si Pablo John sab ang mamahimong kandidato sa PDP-Laban dinhi sa probinsiya batok sa manok sa Liberal nga si kanhi Cebu City councilor Hilario "Junjun" Davide III.

Gawas nga magtigi ang duha sa pwesto pagkagobernador, nagtigi sab ang duha kinsa nila ang makakuha ni Bise Gobenador Agnes Magpale isip ilang runningmate. Dunay mga report nga si Magpale aduna nay commitment kang Davide. Apan sa pikas bahin angayang hinumduman nga si Magpale dunay partido nga kinahanglang tumanon.

Ang mga lider sa One Cebu ug sa Bakud Party diin miyembro si Magpale gikatakdang magtagbo pa aron hisgutan ang maong isyu.

Sa higayon nga ang pangulo sa Bakud nga si Ramon "Nito" Durano mohukom nga makig-alayon sa One Cebu sigurado ko nga ang bisan unsa nga commitment ni Magpale mahanaw.

Kun kini mahitabo mosamot kadihado si Davide sa iyang kaatbang. Sa akong tan-aw dako og bintaha si Pablo John ni Davide, gawas sa resources, mas dunay track record si Pablo John.

Sulod sa pipila ka tuig nga nahimong konsehal si Davide sa dakbayan wala koy nahinumduman nga duna siyay ordinansa nga napasar. Gawas niini, kumon nga feedback nga akong nadunggan gikan sa iyang mga kauban kaniadto sa konseho mao ang iyang katapulan mangampanya. Ang usa sa problema ni Davide, sigun sa feedback, mao nga daw sa wala ni kaugalingon nga baruganan ug nagsalig lang kini sa maayong record sa iyang amahan. Makita ang kakuwang ni Davide sa liderato sa kagubot sa kaugalingon nilang partido.

Nahinumdom mo sa reklamo ni kanhi Senador Sonny Osmeña ug Bogo City Mayor Celestino "Junie" Martinez sa kapakyas ni Davide pagpalig-on sa ilang partido dinhi sa Sugbo ug sa kakuwang sa pagtagad gikan sa nasudnong pamunoan sa partido?

* * *

Email: [email protected]