Ang tukma ug haum sa pagpangalagad

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Nagkaduol na ang bulan sa Oktobre niining tuiga ug kisaw na kaayo ang mga taho nga naglambigit sa politika sanglit nagkaduol na man usab ang bulan sa Oktobre niining tuiga nga maoy gihatag nga mga adlaw alang sa pag-file sa certificate of candidacy (COC) alang niadtong mokandidato sa umaabot nga 2013 local election.

Nunot niining pagkisaw sa mga taho nga politikanhon dinhi sa nasud, ang mga pumipili nga katawhang Pilipinhon nagsugod na usab sa pag-aninaw sa mga politiko alang sa ilang paghashas kun tukma ug haum ba ang mga hingtungdan sa pagpangalagad sa katungdanan. Adunay nag-ingon nga daghan ang mga tawo nga nagtinguha nga mahimong politiko apan ang nakapait ang politika maoy nagdumili usab sa pagdawat kanila sanglit makasinati man gayod og kaparutan sa matag higayon sa ilang pagsalmot niini.

Matud pa nila nga adunay mga tawo nga hilabihan ka mahigalaon ug matinabangon sa ilang isigkaingon apan kun mosulod na gani sa natad sa politika dili man gayod magmadaugon.

Daghan hinuon ang kapasanginlan nga hinungdan nganong makaangkon og kaparutan ang kandidato sa gitinguha niyang katungdanan sa panahon sa piniliay.

Naglakip sa mga hinungdan mao ang gialigar nga gitikas ang resulta sa mga kaatbang nga kandidato, ang kulang sa kuwarta nga igasto sa kandidatura, ang gisakyan nga partido wala mohatag og hugot nga suporta sa kandidatura ug daghan pa.

Matud pa nila nga anugon kaayo kadtong kandidato nga haum ug tukma unta sa pagpangalagad sa katawhan apan ang nakapait kay mapildi man sa piniliay ug ang modaug mao na hinuon kadtong mga politiko nga maayo lang sa estorya apan walay kabangkaagan sa pagpangalagad sa katungdanan.

Dugang pa nila nga kini gayod ang sagad sa mga hinungdan nga sa panahon na sa ilang paglingkod sa katungdanan maoy masinati sa katawhan ang kapakyas sa gipaabot unta nilang kalamboan. (Romeo T. Limpangog)