Ang balance

Usa sa gipanawagan sa mga anak sa singot atol sa ilang adlaw mao ang pagwagtang sa kontraktwalisasyon tungod kay wa kini makahatag og kaseguroan sa ilang pagpanarbaho.

Tinuod, wala gayoy kaseguroan sa iyang pagpanarbaho ang anak sa singot nga ubos sa sistimang kontraktwal tungod kay human sa iyang kontrata mangita naman usab siya og laing trabaho ug sayod na kita nga lisod gayod kaayo ang pagpangita og trabaho. Maong mas maayo gayod nga mahimong kanunay o permanente ang imong trabaho aron dili ka na magsige og pangita niini. Mas bintaha man ugod kun permanente ang kahimtang sa imong pagpanarbaho tungod kay basta dili ka lamang magbinuang makatrabaho ka man gayod hangtod sa pag-abot sa pangidaron sa imong pagretiro. Kini ang hinungdan kun nganong ang mga nakatrabaho na nga mga anak sa singot dili gusto sa kontraktwalisasyon ug gipanawagan ang pagwagtang niini. Apan angayan bang wagtangon ang kontraktwalisasyon?

Sigun sa talaan sa Department of Labor adunay hapit moabot sa tulo ka milyon ka mga tawo sa Pilipinas ang walay mga trabaho, upat ka milyon ang nanarbaho apan wala makadawat sa ilang suweldo ug unom ka milyon ang mga under employed. Gawas niini, gamay ra usab ang namugna nga trabaho sa atong gobyerno. Kun wagtangon ang kontraktwalisasyon, ang hapit moabot sa tulo ka milyon nga walay mga trabaho dili na gayod makatrabaho ug kun makatrabaho man anaa na sila sa edad sa pagretiro. Ang mga walay trabaho magpaabot ug mag-ampo una nga adunay magretiro o matangtang sa mga permanente nga trabahanti aron siya ang makapuli. Tungod niini, dili pa kita andam nga wagtangon ang sistimang kontraktwalisasyon sa pagpanarbaho gumikan kay mosamot ka luoy ang mga walay trabaho.

Samtang dili pa makahatag og daghang trabaho ang gobiyerno ug samtang aduna pay daghang tawo nga walay mga trabaho ipabilin sa nato ang kontraktwalisasyon kay sa maong sistima ang mga walay trabaho may kahigayonan pa nga makatrabaho. Sa kontraktwalisasyon anaa ang konsepto nga bahin-bahin. Busa ang mga nakatrabaho pahuway lang sa mo inig human sa inyong kontrata. Kay nakakaon naman mo pahuway lang sa mo kay ang nangapasmo na usab ang atong patilawon, ang atong pakan-on.