Aktibong pagbabanta

Nakita na nang marami ang video ni Vice President Sara Duterte kung saan binantaan at pinagmumura niya sina President Bongbong Marcos Jr., First Lady Liza Araneta-Marcos­, at Speaker Martin Romualdez. Si Duterte mismo ang nagsabing hindi siya nagbibiro nang sabihing kumuha na siya ng hitman para patayin sina Marcos at Romualdez sakaling siya ang unang mapatay.

Nag-ugat ito sa kasong contempt na isinampa ng House of Representatives kay Office of the Vice President (OVP) undersecretary at chief-of-staff Zuleika Lopez, dahil sa “paggawa ng hindi nararapat na panghihimasok at pag-iiwas” sa pagsagot sa mga tanong tungkol sa kung paano ginastos ang confidential funds ng OVP. Parang walang katapusan ang political­ chess sa pagitan ng Kamara at ng OVP. Ang hindi ko maintindihan ay bakit hihilingin ni Lopez sa Commission on Audit (COA) na huwag ilabas ang audit observations nito sa House Committee on Good Government and Public Accoun­tability kung wala namang tinatago.

Mula nang magsimula ang mga pagdinig, naging palaban agad si Sara sa pakikipag-ugnayan sa Kamara at sinasabing pamumulitika at pag-atake ng mga taong may ambisyon para sa 2028 elections. Nakikita naman nang marami ang kanyang mga kilos bilang isang paglilihis mula sa mga isyu. Pero iba rin itong pinakabagong video na inilabas niya kung saan hindi na siya nagpigil. Para na siyang si Donald Trump na naglalabas ng mga tweet ng hatinggabi o madaling araw. Siya pa naman ang pangalawang pinakamataas na opisyal ng lupain.

Naglabasan na ang mga meme, ang mga mabangis na opinyon na nagmumula sa magkabilang panig. Malinaw na sinususian ni Sara ang kanyang marami pang tagasuporta. Ngunit may mga pagod na sa kanyang mga kilos at tinatawag itong hindi nararapat sa matataas na opisyal ng gobyerno.

Ang Palasyo ay tumugon na sa pagkakataong ito sa pagsasabing ang mga banta ni Sara na patayin si BBM kung siya ang unang mapatay ay “aktibong banta” at ipinaalam na sa Pre­sidential Security Command para sa agarang aksyon. Hindi alam kung ano ang mga aksyon na iyon, ngunit huhulaan ko na ito ay pagpapalakas ng detalye ng seguridad ng Presidente at hindi direktang aksyon laban kay Sara Sigurado walang aarestuhin. Kung ordinaryong tao nagsabi niyan, ibang-iba ang magiging tugon. Tila naging malinaw ngayon kung bakit nais ni Sara ng kanyang sariling Vice Presidential Security Group. Alam na niya noon na makikipag-away siya sa Presidente, sa pamamagitan ng disenyo o pangyayari.

Naririnig ko na ang mga mangangatwiran at tagapag­tanggol kay Sara, lalo na sa Senado. Sasabihing pagmamalabis na dala ng pagkadismaya at ang kanyang mga banta ay kulay lang at hindi naman seryoso. Ngunit sinabi ni Sara na “no joke.” Kaya, iyon ba ay dapat turiing eksaherasyon para sa mga eksaherasyon?