Anti-fencing law

Angay na g’yud lagi ipatuman ang balaud kabahin niining pagpamalit og mga segunda-mano nga mga butang.

Ang usa gud sa makapadasig sa mga kawatan nga mopadayon sa bati nila nga batasan mao nga duna may mamalit.

Ang Presidential Decree 1612 gimugna atul sa administrasyon ni kanhi Presidente Marcos ug hangtud karon “applicable” pa gihapon kining balaura nga ang tumong mao ang pag-discourage sa pagpamalit og butang-kinawat.

Apan unsaon, wala man kini hugti sa pagpatuman sa atong kapolisan. Ang mga polis pinaagi sa mga sakop sa Theft and Robbery Section (TRS) nga mao unta ang gitahasan, wala man mohimo sa angay nila nga buhaton. Hilig kaayo ko motan-aw og mga segunda-mano nga butang mao nga kun may bakante ko nga oras mosuroy g’yud ko sa mga dealers og surplus. Makakita g’yud ko og mga tawo nga mobaligya og mga butang nga tingali ang uban kinawat.

Ang mga surplus dealers sa walay pupangutana kun ang nagbaligya mao ba ang tag-iya, bayad lang dayon kun magkasabot sa presyo. Basi sa lagda nga gilatid sa Presidential Decree 1612, dili kini maoy tukma. Ang Anti-Fencing Law naglatid nga kadtong mopalit og mga butang nga walay siguro kun ang nagbaligya mao ba gayud ang tag-iya, mahimong mopalit apan dili dayon niya ibaligya ang maong mga butang.

Ang gilatid nga lagda mao nga sulod sa duha ka semana, dili niya ibaligya ang mga butang ug kinahanglan nga mosumiter ang mga surplus dealers og lista ngadto sa kapolisan kun unsa ang ilang mga napalit.

Ang tumong niini aron nga kun dunay mga tawo nga nakawatan og mga butang ug mo-report sa mga polis, mahimong adto dayon motan-aw sa mga butang nga napalit sa mga surplus dealers.

Gilatid usab sa balaud nga ang mga polis, ilabi na kadtong nadistino sa Theft and Robbery Section (TRS) gihatagan og katungod nga maka-inspection sa mga surplus shops. Gitawag kini og “visitation power.”

Tan-awa kadtong dagko kaayo nga mga tingga nga gipangawat gikan sa usa ka French vessel, didto nasakmit pagbalik sa kapolisan nga gibaligya sa usa ka surplus dealer.

Mihatag ba gud og report sa kapolisan ang maong surplus dealer nga nakapalit siya niadtong maong mga tingga? Alang nako, kadtong maong surplus dealer angay nga pasakaan og kaso nga paglapas sa Anti-Fencing Law.

Ang tumong niini aron mahadlok ang ubang surplus dealers nga sundon ang gihimo sa kauban nila sa negosyo.

Gihisgutan nako kining maong isyu aron pag-ikag kon pagdasig sa mga polis nga nadistino sa TRS diha sa lainlaing mga police stations nga basahon nila pagbalik ang mga lagda nga gilatid sa PD 1612.

* * *

Uy, atensyon mga sakop sa Cebu Media NewsCoop! Duna ta’y general assembly karong buntag ha adto sa Marcelo Fernan Press Center diin magpili usab kita og mga bag-o nato nga opisyal sa kooperatiba.

Gusto unta ko nga molansar pagka direktor apan mora’g maapike ko sa oras ug maglisud ko pagtambong sa mga miting unya. Kada Biyernes gikan sa alas dies sa buntag man gud magsugod mao nga conflict sa akong trabaho, dili na lang.

Suportahan nato ang mga tawo nga maantigo sa gimbuhaton ug adunay panglantaw sa kaugmaon sa atong kooperatiba.