Husto ba ang gibuhat sa STC?

Ang mga dagkoan sa Saint Theresa’s College (STC) gikiha sa usa sa mga ginikanan, kinsa wa makauyon sa desisyon sa mga madre, diin ang estudyante nga miplastar og law-ay nga hulagway sa Facebook wala paapila’g paso sa ilang hayiskol graduwasiyon.

Matud pa, nga nagtupis lang kuno ang maong estudyante nagbitbit pa gyud og ilimnong makahubog ug nagkimpit pag sigarilyo. Maayo ba ang iyang gihimo? Mao ba kini ang matang sa kinaiya nga gipasunod sa mga madre kaniya?

Ang STC nabantog nang usa ka eskuylahan nga puno ang mga pagtudlo bahin sa moral values. Mga mithi  nga iyaha sa Ginoo maoy gitanom sa mga madre ngadto sa hunahuna ug sa kasingkasing sa mga bata. Busa, normal lang sa usa ka relihiyosong tunghaan kun mohatag og sanction sa ilang mga estudyante sa panahon nga makalapas sa mga lagda. Kabahin kini sa pag-agak sa mga linghod pag-salabotan ngadto sa matarong dalan sa kinabuhi.

Kun sa atong panimalay, kitang ginikanan adunay gipasunod nga balaod sa atong mga anak, ang eskuylahan naa sab. Panahon pa lang sa enrolment, ang tagdumala sa STC mipasiugda nag briefings and orientations nga gitambongan sa mga ginikanan. Dinhi gipahibalo sa mga madre ang higpit nga patakaran sa pagpareserbar ug pagpalambo sa moral values nga maoy gipasunod sa ilang mga estudyante. Gani, human sa maong briefings, gisuna man ang mga parents: “Karon nga nahibalo na mo unsa kami kahigpit, panahon na nga modesider mo. Idayon ba ninyo ang inyong anak sa pag-enrol, o mobak-awot? Apan unsa bay gipili ta, mga ginikanan?

Gipa-eskuyla ang mga anak nato sa STC. Nga sa ato pa, nakagusto ta sa ilang mga lagda. Midawat ta sa kaistrikta nila sa pagpasunod sa ilang mga balaud nga maghatod sa atong mga bata ngadto sa desente nilang kaugmaon. Nga sa ato pa, duna nay meeting of minds, duna nay bridge of contract between two parties who agreed to follow said rules and regulations implemented in school.

Unya nganong midangop man dayon ang mga ginikanan ngadto sa korte ning akto nga gihataga’g disciplinary action sa eskuylahan ang anak nga nakalapas sa mga balaod? Nganong mi-short cut man sila? Di ba angay mang-unahog duol ang mga kadagkoan sa tunghaan aron istoryahan ug resolbahon ang maong problema? Ikaduha, gidid-an unta nila ang media pagsulod sa eksena.

Ang mikihang estudyante, produkto sa Saint Theresa’s College, ang istriktang institusiyon nga nagtamod gyud pagtudlo sa kabililhon sa moral values ngadto sa ilang mga tinun-an. Kun ikaw  pa kaha ang madre, unsay imong bation sa higayon nga inig abli sa Facebook, maoy mosugat sa panan-aw ang hubong lawas sa imong produkto, kinsa nagbikini lang, unya nagkupot sa ilimnong makahubog paris sa dinagkotang sigarilyo? Malipay ka ba? Dili ba kaha abotog labihang kaguol, o kadismaya? Kay ang gibuhat niining estudyanteha, makadaot baya sa birhen nga imahen sa eskuylahan.

Samot na, nga kanang mga dalan nga naglibot sa STC gihimong istambayanan sa mga prosti, kinsa nagdispli sa ilang matentalong lawas nga For Hire When the Price is Right.

Nahadlok ang mga Sisters nga tungod sa gihimo sa estudyante, basig maalaan na hinuon ang mga taga STC nga mao kanang mga indayhilay nga nagladlad ug nagbaligya sa ilang dungog magabii. Kaluoy, no, sa mga tinun-an kun dili madepensahan sa mga madre? Busa alang ning tagsulat, husto ang gibuhat sa STC. Angay lang nga tagaag disciplinary action ang nakalapas sa mga lagda aron dili maduhig sa kaulawan ang mga Theresians nga wa ug wa gyud magbuhat niini.