Mga politiko nga namisita nanghatag og bugas

Namatikdan karon ang paggimok sa politika sa kabarangayan tungod sa pundok sa mga politiko nga kalit lang motumaw nga magpatapok sa mga tawo nga manghatag og bugas ug magparipa.

Ug ang pipila ka mga dapit nga gisuroy na sa maong pundok sa mga politiko mao ang pipila ka barangay sa ikaunom nga distrito sa lalawigan sa Sugbo.

Nahingangha kaayo ang mga molupyo sa mga dapit nga masum-okan sa maong pundok sa mga politiko tungod kay wala nila damha nga adunay tagsa ka kilong bugas nga gipanghatag kanila.

Gibati nila ang kahingangha sa kalit nga pagtumaw sa maong pundok sa mga politiko sa ilang dapit nga nanghatag kanila og tagsa ka kilong bugas tungod kay dili man sila biktima sa katalagman sama sa sunog, baha ug uban pa.

Ang usa ka tigulang babaye nga nakadawat og usa ka kilong bugas usa sa gibati og katingala sa pagtumaw sa maong pundok sa mga politiko nga wala makapugong nakapangutana kun unsa man ilang katuyoan nga nanghatag man og bugas ngadto kanila nga wala sila maigo sa sunog.

Ang politiko nga gipangutana igo lang nga nakapahiyom ug mitubag nga pamisita lamang ang ilang gihimo ug ang ilang pagpanghatag og bugas ilang gituyo aron sila mahinumdoman ug dili makalimtan.

Dili hinuon matukib ang gibating kalipay sa mga molupyo nga nakadawat og tagsa ka kilong bugas uban ang panghinaut nga matag adlaw ilang pagpamisita aron matag adlaw usab sila nga makadawat og tagsa ka kilong bugas ug pakapinan pa gayod unta kini og linatang sardinas.

Gipanghimakak hinuon sa maong grupo sa mga politiko nga ang ilang pagpanghatag maisip na nga kabahin sa ilang pagpangampanya kay ilang tumong sa pagpanghatag maoy pagpaambit usab sa mga grasya niining panahona.