Ang sagbot nga mangagaw
Usa kini ka matang sa tanom nga manurok sa mga yutaong tugkaran o sa kasagbutan nga usahay ato lang matumban. Daghan na ang nakadungog niini ug nakakita apan wa kaayo makaila sa kabililhon sa birtud o benepisyo nga mahatag sa atong kinabuhi. Sama sa isugilon ko ning atong lindog karon.
Na-admit ko niadto sa ospital.Diha ko gipahiluna sa usa ka kwarto nga adunay upat ka cubicle o mugbo nga partition alang sa upat ka pasyente. Unya sa kasigbit ko, gihasulan kos kagahob o kalangas. Pipila ka adlaw ana, gipabadlong nako kay migrabe man. May magsige’g hilak ug magyawyaw.
Nasayran ko nga wa nay mahimo pagsalbar ang doktor sa iyang pasyente nga gi-dengue. Hilanat nga way huwashuwas gumikan sa pinaakan sa lamok. Gilayon gipaingnan ko ang tagtungod sa dili pagdugay nga magkuha’g usa ka kumkom nga mangagaw ug lapwaan aron ipainom sa pasyente.
Naghilak mipasalamat ang inahan, kay usa ka oras human gipainom sa linapwaang mangagaw, inanay naulian nga hapit gyud makalas ang kinabuhi.
Nalipay usab ang doktor kay ang pasyente niya gimilagrohan pa nga mamaayo gumikan sa pagtoo ug pag-ampo sa Kahitas-an nga maoy tag-iya sa kinabuhi.
“Sir, salamat sa mangagaw. Daghan kaayo ni sa amoa. Pangibton ug gunahon lang sa tugkaran dayon ibasura, nga may dako diay’ng kapuslanan.
Sa sunod sir, pahibaw-a kos ubang kaayohan nga mahatag ini sa panglawas.*
- Latest
- Trending
