Yong pagkakongresista?

Kapin pa sa tuig sa dili pa ang sunod nga eleksiyon apan ang atong mga opisyal naghuna-huna na niini.

Sa miaging semana pipila sa atong mga lokal nga opisyal ang mideklarar na og asa sila molaban sa sunod nga piniliay.

Unang mipahibawo si konsehal Joey Daluz nga dili siya katalikod ni kanhi kongresista Tony Cuenco busa adto siya molaban niini ug ni Mayor Michael Rama nga maoy kandidato nga suportahan ni Cuenco pagkamayor.

Bisan utang niya sa Bando Osmeña Pundok Kauswagan ang iyang pagkakonsehal apan andam ning kalimtan ni Daluz tungod ug alang ni Cuenco. Human ni Daluz misunod si konsehal Edgardo Labella pagpahibawo nga iyang gidawat ang hagit kaniya nga mopapili pagka-bise mayor sa dakbayan.

Dili na angay'ng kahibudngan ang lakang ni Labella tungod kay way laing kahigayonan nga nagpaabot niya kun magpabilin siya sa pundok sa BOPK. Isip last termer nga konsehal understandable kun mangita siya og laing kahigayonan ug ang pagtapon lang ngadto sa grupo ni Rama maoy haum niyang buhaton.

Didto abli ang ganghaan niya nga magbise mayor ug bisan na gani sa pagkakongresista.

Samtang kun nagpabilin siya sa BOPK dili man niya mamahimong pulihan si vice mayor Joy Young o ba kaha si Raul del Mar pagkakongresista.

Ang moabot nga eleksiyon gipaabot ni nga kulbahinam tungod kay naguba ni Rama ang solidong pundok sa BOPK.

Apan kun hangtud asa ang mahimo ni Rama batok sa pundok ni Osmeña wala pa ta masayod hangtud mahuman ang 2013 election.

Dako hinuon og bintaha si Rama tungod kay siya man maoy incumbent kun kamao siya nga mogamit niini.

Apan usa ka butang ang sigurado dili na ingon niana kasayon ang moabot nga eleksiyon alang sa kampo sa BOPK.

Kini labi pa nga basi sa akong kasayuran nga nahipos daghan sa mga negosyante nga nagsilbi nga supporters ni Osmeña ang giingong mitapon na usab ngadto ni Rama.

Bisan si Del Mar diha sa North District posible nga dili na usab makasinati og sayon nga kampanya tungod kay kun husto ang akong tinubdan posible niyang ikabagat sa mosunod nga eleksiyon mao ang usa ka batan-ong doktor nga gikan sab sa banay sa mga politiko didto sa Ormoc.

Ang akong gipasabot mao si Dr. Yong Larrazabal. Ang akong tinubdan gikan sa business community mao nga si Larrazabal maoy gipangulitawhan karon sa grupo nila ni Rama nga himoon nga kandidato pagkakongresista sa north district.

Si Larrazabal giingong maoy gusto sa kampo nila ni Rama nga iparis ni Cuenco sa South District.

Kun imong tan-awon ang tapad sa BOPK ug sa grupo ni Rama daw sa makita nato nga karon palang andam na ang kampo sa eleksiyon sukwahi sa unang pangangkon sa BOPK nga maglisod ang ilang kontra og pangita og kandidato.

* * *

Email: [email protected]