Scripted ra

Atong maobserbahan nga kun dunay mga bisitang halangdon ang kanato moduaw maningkamot gyud ta pagpakita sa pinakamaayo nga anaa nato. Buot kita nga mahimong halandumon ang maong pagduaw bisan pa man kun kini nagkahulogan og pagpangutang. Ang bililhon mao nga magmalipayon ang atong bisita. Ingon ana kitang mga Pilipino usahay nahimong scripted ra kaayo ang atong pagkinabuhi. Mahimong maayo lamang kun dunay magtan-aw.

Karon mao ang Unang Domingo sa Adbiyento. Ang adbiyento nagkahulogan og PAG-ABOT (Adventus sa linatin). Ning maong panahon atong gipamalandongan ang duha ka mahinungdanong pag-abot sa atong Ginoo. Ang iyang Unang Pag-abot sa dihang siya nagpakatawo ingon og usa kanato. Ang ikaduhang pag-abot mao pa ang atong gipaabot. Kanus-a kini mahitabo ka na, wala kita masayud. Apan mahitabo gyud kini sa tukmang panahon nga sibo sa latid sa Diosnong Panahon. Adunay mga mahinungdanong simbolismo ang Adbiyento. Ang korona (Wreath) ang upat ka mga kandila nga nagsimbolo sa upat ka mga Domingo diin usa niini bulok rosas nga pagadagkotan sa Gaudete Sunday. Ang bulok ning maong panahon mao ang Ube nga nagtimaan sa maigmaton ug sa samang paagi mahinulsolong kinaiya ning maong panahon. Kay mas labing bililhon man nga atong hinloan ang atong tagsa-tagsa ka mga kasingkasing aron mamahimo kitang takos diha sa pakighimamat sa Dios nga Nagpakatawo didto sa pasungan sa Belen. Balik sa script. Manghinaut kita nga makakita kita sa positibong bahin sa ekonomikanhong krisis nga atong nasinati karong mga higayona. Nga dili diay ang pag-commercialize sa Pasko sa pagkatawo sa atong Ginoo ang makapahimo niining bililhon kondili diha sa pagpuyo a kinabuhing kanunay’ng ug tagana sa mga mosunod nga panghitabo. Hinaut unta nga ang pagpunay nato og panglimpiyo kun dunay mobisita nga politiko ang atong himoon kada adlaw. Ug ang paghimo og maayo kada adlaw mao ang atong gasang ikahalad alagn sa Ginoo. Ug nga sa katapusan, atong hinumdoman nga ang Adbiyento maoy haom nga kahigayonan sa paghinumdom nga kita gilalang alang sa Langit. Ug busa angay ug matarong lamang nga atong ipunting ang atong paglaom nga dunay mas nindot pa nga giandam ang Dios alang kanato.