Padayon NEWGAD

Karong bulana takdo nang walo ka tuig ang NEWGAD o New Generation Against Drug and Corruption nga nahimugso kaniadtong Septiyembre tuig 2003. Tungod niini nakalinya ang among mga kalihokan niining semanaha sulod ug gawas sa Southwestern University diin nakabasi kining maong kahugpungan. Aduna kami photo exhibit diin among gipakita ang mga nahimo namo sulod sa walo ka tuig nga pagkampanya batok sa ginadiling drugas, mga hulagway sa mga tawo nga nalambigit sa ginadiling drugas ug mga balita nga napatik sa mga pamantalaan nga naghisgot sa mao gihapong suliran. Gawas niini amo usab nga gitigom ang mga libud-suroy nga mga bata sa South Bus Terminal kagahapon sa hapon ug gipasabot mahitungod sa kadaut nga ikahatag sa ginadiling drugas ug pagka human amo silang gipakaon. Karong Biyernes o ugma magpahigayon usab ang NEWGAD og feeding sa usa sa mga barangay dinhi sa dakbayan sa Sugbo pero dili lang namo ipahibalo kun asa kining barangaya basta kay moabot ra mi diha sa inyo. Pagka Sabado sa buntag, unang adlaw sa Oktubre dako namong garbo nga ipahibalo diha kaninyo nga among makauban ang atong halangdong mayor sa dakbayan sa Sugbo, si Mayor Michael Rama isip pinasidunggang dinapit sa among panagtigum diin iya unyang iasoy ang mga kalampusan ug kapakyasan sa kampanya sa dakbayan batok sa ginadiling drugas.

Tugoti nga akong ipaabot diha kaninyo sa makadiyot ang kasaysayan sa New Generation Against Drug and Corruption o NEWGAD human molimbag ang walo ka tuig sa iyang pagkahimugso.

Isip nagpakabana sa suliran sa ginadiling drugas, inabagan sa akong kauban nga magtutudlo sa College of Arts and Sciences sa Southwestern University nga si Ms. Merilyn Sy ingon man mga tinun-an sa nahisgutang tunghaan among gitukod ang NEWGAD niadtong Hulyo tuig 2003 ug pormal nga gilusad nianang pagka Septiyembre sa mao gihapong tuig. Human niadto nagpadayon hangtod karon ang iyang mga kalihokan nga nagkampanya batok sa ginadiling drugas.

Ang kampanya sa NEWGAD batok sa ginadiling drugas wala lang kini diha sulod sa tunghaan ug dakbayan sa Sugbo kun dili miabot na usab kini sa laing mga dapit sama sa lalawigan sa Sugbo ug Bohol ug ang iyang mga sakop nga naggikan sa nagkalain-laing dapit sa nasud gitahasan usab sa pagsangyaw sa ebanghelyo sa NEWGAD.

Tungod sa subsob nga kampanya sa kahugpongan batok sa ginadiling drugas, ang Southwestern University gipasidunggan sa Commission on Higher Education ug Philippine Drug Enforcement Agency nga pinakamaayo nga Higher Educational Institution dili lamang sa rehiyon 7 kun dili sa tibook gayod nga Visayas area sa pagpatuman sa kampanya batok sa ginadiling drugas. Gani hapit pa niini madaug o makuha ang nasudnong pasidungog.

Kay wala makontento isip usa lamang ka kahugpongan sa mga tinun-an ug naila lamang sa tunghaan, ang NEWGAD nagparehistro sa Securities and Exchange Commission ug nahatagan og legal nga personalidad kaniadtong Septiyembre 3, 2010. Kagahapon pormal na usab namong gibuksan ngadto sa publiko ang among website. Kun gusto mo nga moduaw sa NEWGAD adto lang sa newgad.org ug iya kang padayonon.

Sa mga sakop sa NEWGAD nga nagpadayon sa pagpakigbatok sa suliran sa ginadiling drugas ayaw pagpakawala sa imong paglaum nga mawagtang kining suliran nga dangan sa atong katilingban, hinonoa padayonon ta ang unsa man nga atong nasugdan. Congratulations!