Love is an Island

Si Tay Noni ang nihatag og usa ka hamubo apan tabunok nga paghulagway sa gugma. Siya niingon: “Love is an Island sorrounded by expenses!”

Hinuon kun maghisgot kita og galastohan dili lang kini nato sabton nga kutob lang sa pinansiyal nga konsiderasyon. Adunay tulo ka T’s nga atong isipon. Kini naglangkob sa time (panahon) nga bisan pa man unsa kahagip-ot o kalisud kinahanglan nga moadto gyud aron lang mogahin ka og panahon uban sa imong hinigugma.

Talent (Kaantigohan) ang imong abilidad imong gamiton   dili lang aron mamahimo kang mainila o magpakabuhi pinaagi niini kun dili mahimo nimo kining magamit sa pagpahimuot sa imong hinigugma.

Treasure (panudlanan). Bisan unsaon dili nato mahimong wad-on ang elemento sa panudlanan mismo diha sa usa ka relasyon. Dili paigo ang bahala’g saging basta loving. Dunay mga galastohan nga angayang pangandaman.

Ang pagpundo og igong salapi alang sa usa ka wholesome nga lulinghayaw o dili ba kaha alang sa mga emergency ang mahinungdanon kaayo aron makab-ot nato ang atong gitinguhang pag-enjoy sa panahon kuyog sa atong gihigugma.

Ang Dios ang mihimo usab og paggasto aron iyang mapakita ngadto sa mga tawo ang iyang dakong gugma ngadto kanila. Ang labing dakong gasto nga nahimo mao man ang iyang bugtong anak nga tungod ug alang kanato nidupa sa krus. Hinuon dunay mga tawo nga bugtong ilang kaugalingon lamang ang ilang gitan-aw. Dili buot mosakripisyo ug dili buot mogasto. Buot lang silang modawat ug modawat lamang sa mga benepisyo. Mahimong gamiton lamang nila ang ilang isigkaingon ug abusohan ang kaayohan nga ilang gisinati.