Ang peso-pesong tubig

Ang mga water vending machine dugay na dinhi sa dakbayan sa Sugbo ug daghan na ang mga reklamo bahin sa mga gisakitan og tiyan human makainom sa tubig nga gikan sa mga water dispenser nga anaa sa daplin sa mga kadalanan.

Ang tinuod ang bugtong nasayud sa kahinlo sa maong tubig way lain gawas sa tag-iya ra gyud sa maong tubig.

Kun butangan og gikan sa kanal ang maong dispenser, way laing nasayud kundi ang tag-iya sa maong baligyang tubig.

Kay may mga otoridad bang misusi sa mga gallon nga gisudlan nianang tubig nga paagason pinaagi sa ihagbong nimong peso.

Ambot sa kadugay na niining negosyoha, way mga taga City Hall nga nagtagad sa pagsusi unsa kaluwas imnon sa maong tubig.

Di baya para panghugas ug panglaba ang tubig nga paagason pinaagi sa peso-peso nimong ihagbong.

Kay inighagbong nimo sa imong peso moagas ang usa ka baso nga ang-ang kaayong ipanghunaw kay mokitiw ang imong kamot sa katugnaw o kaha mapaso ka sa kainit.

Aw kun hugaw ang gikuhaan sa maong tubig, siyempre nakainom ka og hugaw.

Sama sa ubang tindahan, nga kumo kay ang water vending machine, usa ka matang sa negosyo nga may labot sa pagkaon, ang unang mohimo og lakang niini way lain kundi ang taga City Health Department.

Ug tungod kay balaod man ang gikinahanglan aron makontrolar ang maong negosyo, kinahanglang ang konsehal nga nagdala isip chairman sa committee on health sa konseho maoy unang mohimo og lakang niini. Di    ba?