Mga lamas sa kinabuhi Pagpamalandong alang sa Malangkubong Kaayohan

Ang tinuod nga ikaw

“Bahala sila kun unsa ang ilang isulti!” Kay lagi ang matuod you cannot please everybody. Husto pud. Ang tinuod nga ikaw maoy nagpunting sa tubag sa pangutanang: “Kinsa man ko?” Ug ang tubag wala mag-agad sa Public Opinion mahitungod kanimo kondili kun sa unsang paagi diha sa imong kahiladman nakita mo ang imong kaugalingon. Si Philip McGraw nagkanayon: “The authentic self is the you that can be found in your absolute core. It is the part of you that cannot be defined by your job, or your function, or your role.” (cf. Self Matters p.30). Nga sa ato pa, nilihok ka ug nihimo og mga desisyon sa kinabuhi nga nagasukad mismo sa imong kagawasan diha sa pagpili. Ang imong mga lihok ug mga desisyon ang nagasukad gayud sa imong priyoridad ingon nga ikaw ug dili tungod kay maoy giingon nila nga imong buhaton alang kanimo. Mao kini ang mga tawong maantigong mo-risgo ug masakitan gumikan sa ilang pagpanalipod sa ilang kaugalingong baruganan taliwala sa mga pagsupak. “Become what you are!” mao kini ang hagit ni Nietzche alang kanato. Kun tinuod mong gihigugma ang imong kaugalingon, pagkat-on pagpadayag sa imong tinud-anay nga gibati ug panlantaw bisan pa man kun dunay dili mouyon kanimo. Ayaw himoang bilanggoon ka sa mga panlantaw sa imong isigkaingon. Lahi sila, lahi ka. Managlahi gyud ang tanan ug kini maoy nakapahimo sa kinabuhi nga mabulokon.