Magpale o Soco?

Haskang luoya ni Bise Gobernador Greg Sanchez. Patay na, gusto pa gyud nilang hukasan sa iyang titulo. Kun kinsa may responsable sa kalit nga pag-irog sa election protest batok niya samtang naghingutas na si Sanchez sa kamatayon way bisan gamay’ng kaikog. Uban ang lubos itom nga kasingkasing, gipahimuslan nilang higayon nga di nang kapanalipod si Sanchez sa iyang kaugalingon.

 Bisan moinsistir pa si Glenn Soco, kaatbang ni Sanchez sa niaging piniliay, nga igo rang nilihok ang kaso sa iyang kaugalingong gikusgon, mas abunda ang mga sukaranan sa mga pagduda sa maniobra. Sama kadaghan sa buslot sa sistema paghusay sa mga protesta sa piniliay ang kadako sa panginahanglan nga si Soco ang mapahimutang sa ikaduhang labing taas nga katungdanan sa lalawigan.

* * *

Ang mopuli sa buhatan nga permanenteng nabakante sa kamatayon ni Sanchez maoy usa sa labing dako og tingog sa sunod nga piniliay sa 2013. Kanus-a mapupos na ang ikatulo ug kataposang termino ni Gobernador Gwen Garcia. Ang sayo kaayo nga pagsibog ni Kongresista Pablo John Garcia nidason sa sibaw nga kabalaka sa mga sakop sa One Cebu nga hilaw ug palaaway ra kaayo siya aron makadaog batok sa mas lig-on na nilang mga kaatbang nga pangulohan ni kanhi Cebu City councilor Hilario Davide III duha ka tuig gikan karon.

Bisan sa ilang kasamtangang kasuod ni Acting Vice Governor Agnes Magpale, si Garcia di hingpit nga makasalig niya. Kay, segun sa kasaligang mga tinubdan sa Kapitolyo, kun dunay sakop sa provincial board nga takos ug way kahadlok nga mosukol ni Garcia, kana mao si Magpale. Mas makasalig ang mga Garcia sa ilang politikanhong kaugmaon kun ang ilang manok nga si Soco ang makapuli ni Sanchez.

* * *

Karong patay na si Sanchez, kinsa pa may molalis sa pasangil ni Soco nga nanikas siya sa pipila ka mga presinto sa Mandaue City ug Consolacion sa piniliay niadtong Mayo 2010? Tinuod nga duna pay mga abogado ug mga dumadapig si Sanchez, nga karon init pa kaayo nga nanumpa pagpadayon sa iyang kawsa, apan kun wa na ang prinsipal kinsa pa may inspirasyon nila?

 Nga mao say makapugong sa Liberal Party (LP), ang partido ni Sanchez, sa aktibo nga pagpanginlabot sa kaso. Wa silay insentibo. Bisan kapugngan pa nila ang paglingkod ni Soco. Kay gawas nga di sakop sa LP, si Magpale suod nga alyado sa mga Garcia.

Gawas kun makaamgo si Magpale nga mas kusog diay ang pitik sa iyang kasingkasing alang sa LP kay sa One Cebu. Ug kun makamatngon ang mga Durano nga mas makaayo diay nga magsugod na sila og baiid sa Malakanyang pinaagi sa pagtalikod sa hapit na mosawop nga adlaw sa mubo ra kaayong dinastiya sa mga Garcia.

* * *

Email: [email protected]