Beato Juan Pablo II, i-ampo mo kami!

Gideklarar na ni Papa Benedicto XVI si anhing Papa Juan Pablo II nga usa na ka “blessed” kon “Beato” sa usa ka taas nga seremonyas kagahapon didto sa St. Peter’s Basilica sa Vatican sa Italya.

Ang pagkadeklarar ni Papa Juan Pablo II nga Beato kagahapon atol sa Beatification Rites nga gipanguluhan sa iyang sumusunod nga si Papa Benedictus XVI maoy ikatulo sa upat ka ang-ang paingon sa iyang pagka-Santo. Una niini, ang tawo ideklarar nga “Servant of God” unya ideklarar sa ikaduhang ang-ang nga “Venerable” sa dili pa ang “Blessed” kon “Beato” ug sa katapusan mao ang pagka-Santo.

Ang Beatification usa ka proseso pag-ila sa Romano Katoliko nga Simbahan sa usa ka patay nga tawo sa iyang pagsulod sa langit ug makapangayo na og tabang (intercession) gikan sa Ginoo.

Usa lamang ka rekisito ang gipangayo aron madeklarar nga Beato ang usa ka tawo ug kini mao ang usa ka milagro pagpangayo sa iyang panabang (intercession).

Usa ka French nga madre nga si Sister Marie Simone-Pierre nahiagom og Parkinson’s disease ug niadtong Hunyo 2, 2005 nananghid na siya sa iyang madre superiora nga dili na siya makapadayon sa pagserbisyo tungod kay nagkagrabe ang iyang Parkinson’s disease. Apan sa iyang pag-ampo sa panabang ni Beato Juan Pablo II, naayo siya sa iyang sakit.

Kagahapon, si Sister Marie ang midala sa relikiyas nga mao ang “vial” sa dugo sa bag-ong Beato paingon sa altar.Ang relikiyas naglangkob sa bisan unsang parte sa lawas ug personal nga kagamitan sa tawo nga ideklarar nga beato o santo. Mao kini ang gamiton alang sa “veneration” kon pagtahod kaniya isip tawo nga makatabang sa mga buhi pagdala sa mga intensiyon ngadto sa Ginoo. Pag-ila kini sa iyang paghisulod sa Langit diin tua didto ang mga Anghel ug Santos.

Wala hinuon maka-ikyas sa mga pagsaway ang paspas nga proseso sa pagka-Beato ni Papa Juan Pablo II.

Karon pa lang sa pagka-Papa ni Benedicto XVI nga gilapas niya ang lima ka tuig nga “waiting period” sa dili pa masugdan ang pagtuon alang sa pagka-santo sa usa ka tawong patay na human niya gimando ang beatification process human mamatay si Beato Juan Pablo II niadtong Abril 2, 2005.

Ang gibuhat ni Papa Benedicto XVI agi og tubag sa singgit sa mga tawo nga nanambong sa paglubong ni Beato Juan Pablo II nga “Santo Subito” nga sa ato “Santo karon dayon.”

Laing pagsaway niini mao ang mga eskandalo nga nanghitabo sa panahon sa pagka-Papa sa bag-o nato nga Beato.

Sa iyang panahon, daghang mga pari ang gipang-akusahan og pagpanglugos, pedopilya ug uban pa.

Apan daghan gihapon ang midepensa alang sa bag-ong Beato. 

Bitaw, kinsa man ang perpekto, dili ba ang Ginoo lamang.

Sakto nga sa iyang pagka-lider sa Simbahang Katoliko Romano, nagpuyo siya nga usa ka Santo ug namatay nga usa ka Santo.

Nakita man sa tibuok kalibutan ang mga binuhatan ni Beato Juan Pablo II ug nabasahan ug nadunggan man ang iyang mga pagtulon-an nga nakaluwas og daghang kalag nga nanghisalaag.

Isip punoan sa Simbahan, tahas sa Santo Papa ang pagseguro nga ang nga magtutuo maluwas gikan sa mga panulay ug sama niya, makasulod sila sa ganghaan sa Langit kun maabot na ang adlaw sa panudya.

Dili man usab mahimong ihapak kang Papa Juan Pablo II ang mga sala sa mga karaho nga mga pari. Gawas pa, mga tawo lamang usab sila nga mahimong ma-expose sa kasal-anan.

Bisan dinhi sa Pilipinas, giila ang mga pagtulon-an ni Beato Juan Pablo II.

Usa ka dakong dungog ang kamatuoran nga sa duha ka higayon, si Beato Juan Pablo II nakaanhi ug nakataak sa atong yuta.

Ang pagdeklarar nga Beato sa usa ka tawong patay dili magpasabot nga mahimo na siyang tahuron (venerate) sa tanang suok sa kalibutan.

Aduna gayo’y dekreto gikan sa Vatican nga magmando sa pag-venerate sa usa ka Beato sa mga piniling lugar lamang.

Apan sa kaso ni Beato Juan Pablo II, nagtuo ko nga i-venerate siya sa tibuok kalibutan tungod sa iyang pagka-inila nga sa Santo Papa.

Gani, siya ang Santo Papa nga nailang kusog kaayong mobiyahe ngadto sa kasanuran sa kalibutan.

Siya usab ang usa ka Santo Papa nga akong nailhan nga bukas sa “ecumenical dialogue” kon panagsinabtanay tali sa ubang relihiyon.

Sa iya usab nga panahon isip Santo Papa nahitabo nga ang laing hugpong sa mga Katoliko, ilabi na sa Eastern Church sama sa Orthodox Catholic, ug Syro-Chaldean Catholic, gitugotan nga makig-“communion” sa Santo Papa. Usa ka amigo nga Orthodox Catholic miingon nga nagpasabot kini nga ang ilang “hierarchy” ug mga “rites” girespetohan sa simbahang Katoliko Romano.

Dinhi sa Sugbo, garbo kanato nga aduna kitay paisano nga na-elevated ngadto sa pagka-blessed. Siya si Beato Pedro Calungsod kinsa kun madeklarar nga Santo, ikaduha siya nga Pilipinong Santo, sunod ni San Lorenzo Ruiz de Manila.