Sa ubang nasud, priority ang agriculture, dinhi sa ato, condom!

Sa miaging tuig, migahin kita og 400 milyones pesos aron ipamalit og condom ug mga drugas kontra pamabdos kon contraceptives. Kini, matud nila ni Lagman, in support sa RH bill o sa responsible parenthood, o population management program sa nasud.

Miingon sila nga gumikan sa population explosion, pobre ang atong nasud, daghang baba ang hungitan ug pakan-on. Busa, kinahanglan kontrolahon ang pagpanganak, kinahanglan likayan ang pagpamabdos.

Mahimo ang pakighilawas bisan kinsa, basta mogamit lang og condom ug mga drugas kontra pamabdos. Kini ang sulbad sa kawad-on sa atong nasud, dili ang agricultural production.

Sa ubang nasud, priority number one ang food prouction. Kay alang nila, magkinaunsa man ang kalibutan, maggubot man ug magkrisis, dili sila magtuman. Apan kita dinhi, priority ang condom, dili bugas. Bahala nag magutman, basta di lang mamabdos.

Maoy hinungdan nga ang atong mga halandong magbabalaud sa ubos balay balauranan, midugang og 3 bilyones pesos nga gahin alang sa population program sa nasud, o dugang pagpamalit og condom.

Ang bugas? Import na pod. Alang sa atong gobyerno, dili priority ang food production. Anytime, makapalit kita niini sa Vietnam ug ubang silingang mga nasud. Mga nasud kansang mga agricultural technician kita ang nagtudlo unsaon pag-produce og daghang bugas.

P400 million plus P3 billion … kadaghan ining kwartaha, ipalit lag condom ug mga contraceptives, aron makapadayon kita pakighilawas – apan di mamabdos.

Pila na kaha ka irrigation system ang matukod niini? Pila na kaha ka uma ang maugmad niini? Ug sama sa Masagana 99 ni Marcos, daku pa ang purohan nga maka-export pa kitag bugas.

Imagine, ang agricultural country nga Pilipinas, maoy labing daku nga importer sa bugas sa tibuok kalibutan! Di ka mauwaw ana, Dro? Karon, naglaraw na usab ang atong nasud, pagpalit og dugang bugas gikan sa gawas. Ngano man? Nganong wa man i-prioritize sa Aquino administration ang rice production?

Aduna bay programa ang Kongreso pagpausbaw sa food production? Nganong mao may ilang giuna ang RH bill, nga matud ni Kongresista Karlo Nograles sa Davao City, nga wala na siya motuo nga ang tuyo sa RH bill mao ang pag-promote sa responsible parenthood, kundili, “an open endorsement for condom makers.”

Buot niyang ipasabot nga ang unang malipay kun mahimo nang balaud ang RH bill, dili ang mga banay’ng Pinoy, kundili ang mga condom manufacturers. Ingonman ang mga “commissioner” kun duna man, lagmit duna, gikan sa lobby money.

Yuna pa, kining P3 billion, initial lang ni. Duna pay dugang gahin ang gipangayo nila ni Lagman ug mga kauban aron magmalampuson gayud kono ang population program sa atong nasud, ug aron atong mabuntog finally ang mass poverty sa atong nasud. Tuo ka ini, Dro?