EDITORYAL - Ang paghinlo sa sapa

Si Mayor Michael Rama nangugat na usab sa pagpalihok sa mga opisyal sa barangay pagpahinlo sa mga kanal, esteros ug sapa nga anaa sa ilang hurisdiksyon.

Kini sa tuyo sa mayor nga malimpyo na ang mga sapa, kanal ug esteros ning dakbayan.

Apan sa pagkatinuod lisod na kaayong kalauman nga matuman ang pangandoy sa mayor tungod kay ang maong mga lugar sa pagkakaron nahimong lasang, di sa mga kahoy kundi lasang sa mga kabalayan.

Unya nganong lisod na kaayong malimpyo ang mga sapa, esteros ug mga kanal, kini tungod kay gihimo kining bulhotanan sa mga hugaw sa matag panimalay.

Ang mga tubo sa ilang mga pansayan anaa ibad-ay sa daplin sa kasapaan ug esteros aron inigbuhos nila og tubig sa ilang inudoro, modiretso og buhagay ngadto sa sapa o estero ang ilang hugaw.

Gani malipayon kaayo ang mga molupyo nga anaa sa daplin sa kasapaan og estero magpuyo kay kun wa silay CR mahimo ma’g anha lang moiwang sa daplin sa sapa tabunan lang og newspaper ang ilang dagway bahala nang makita ang ilang lawas.

Ang pait kaayo sud-ongon mao ang mga estero ug kanal nga stagnant o nagpundo nalang ang tubig kay anaa ang tanang hugaw mapundo usab.

Kun anaa ka sa duol, makuyapan ka sa kabaho, ilabi na kun mosud-ong sa tubig sa maong sapa modigwa ka sa kahugaw.

Tan-awa nang estero sa Palma street nga nasakop sa barangay San Roque di ba bisan maglakaw ka inigkatungod nimo sa maong dapit manimahong kanal ang imong lawas.

Unya ang mga taytayan diha mamuwak magabii sa mga mangiwang aron pagpabulhot sa ilang hugaw.

Ang mga kadaplinan niina nga giriprapan, tan-awa di ba pulos mga tubo nga gikan sa CR sa kabalayan ang gipailadman sa masa aron anha pabuhagaya ang ilang hugaw.

Sa ato pa bisan 24 oras pang limpyohan sa mga opisyal sa barangay, ang maong mga sapa, estero ug kanal di gyud mahingpit ang kahinlo sa maong mga dapit samtang may nanimuyo pang katawhan sa palibot niini. Di ba?