Maayong pinaskohan

Epektibo ang kampanya batok sa pabuto ang mga awtoridad niadtong Pasko. Hilabihang kamingaw sa mga lugar kay walay nagpabuto.

Sa akong na-obserbahan, dili sama sa miaging mga Pasko ang kasaba sa nagkadaiyang lugar, dili usab sama kahugaw ang mga karsada pagka-liwas tungod sa kagamay sa mga tipaka sa pabuto. Unsa pasabot niini?

Pipila sa akong mga amigo nga hilig og pabuto akong gipangutana nganong wala na sila makapabuto ning paskoha.

Ilang tubag gibasol ngadto sa mga awtoridad kay sumala pa nila, lisod na kaayo ipalit og pabuto sa mga naandang palitanan, dili parehas kaniadto nga nagpasad lang sa Colon mura og prutas ang kadaghan sa mga pabuto nga gibaligya.

Karon, sa siyudad sa Sugbo, ilabi na sa dalan Colon, lisod na ang pag-display sa mga pabuto.

Ang mga namaligya og pabuto tua gibutang sa South Road Properties (SRP). Luoy lang kaayo sila kay gilangaw, walay halin kay ang ilang mga tindahan tua nag-atubang sa dagat.

Pero adunay pipila sa akong mga amigo nga nagkanayon “krisis!”

Singgit kini nila isip tubag sa akong pangutana nganong wala nay pabuto karong paskoha sa ilang tugkaran.

Sa ato pa, dili lang diay ang epektibong sistema nga gipasunod sa gobyerno paghigpit sa pagbaligya sa pabuto ang nahimong rason nganong lisod na hidunggan ang paka-paka ning paskoha.

Hasta diay ang krisis sa bulsa ang nakaingon sa kamingaw sa pagsaulog sa Pasko.

Tinuod nga ang krisis nakapugong sa ubay-ubay’ng mga Pilipino pagsaulog sa Pasko.

Daghan sa mga walay trabaho nga dili gani makapalit og tableya ug pilit aron dunay ikasukad sa lamesa alang sa noche Buena.

Ingon niini ang dagway sa kalibutan karon, samtang daghan kita og makit-an sa mga mall ug department store nga nanagbitbit sa ilang gi-shopping, daghan usab sa atong mga igsuon ang nanaglurat ang mga mata tungod sa kagutom.

Apan maayo na lang kay kitang mga Pilipino, ilabi na kitang mga Pilipino, nagtuo nga nindot gihapon ang pasko bisan walay sulod ang bulsa ug walay makaon sa lamesa, basta maayo lang ang lawas ug walay sakit nga gihambin.

Bitaw, mag-unsa man tuod nang kuwarta ug daghang pagkaon sa lamesa kun luya atong lawas ug may gipamati kita.

Ang labing maayong pinaskohan mao ang maayong lawas ug maayong pagbati ngadto sa usa’g usa, wala kitay gitumban, walay gilupigan ug walay gihudas.

* * *

Dili ba kaha moreklamo ang mga business community niining pagduso ni Kongresista Eduardo Angara paghimong regular holiday sa Chinese New Year kun Lunar New Year.

* * *

Nanawagan si Papa Benedicto XVI sa mga Katoliko Romano sa pagmaisogon, ilabi na kadtong anaa magpuyo sa China ug Iraq diin gihigpitan ang pagka-Katoliko.

Ang panawagan sa Santo Papa iyang gihimo atol sa Urbi et Orbi (to the City and the World) nga mensahe niini atol sa pagsaulog sa Pasko.

Gawas sa lisod nga pagkinabuhing Katoliko sa Iraq ug China, adunay mga bayolenteng panghitabo nga misugat sa Pasko sa kalibutan.

Una, isla sa Jolo dinhi sa atong nasud, unom ka mga tawo ang samaran sa dihang mibuto ang bomba sa Simbahan atol gyud sa pagsaulog sa Santos nga Misa sa Pasko.

Sa Nigeria, 38 gyud ang nangamatay sa dihang nangatake ang grupo sa mga Muslim sa Simbahang Katoliko atol gihapon sa Santos nga Misa alang sa Pasko.

Didto usab sa Pakistan, usa ka babaye nga suicide bomber ang milabay og granada sa World Food Program project diin sobra sa 80 ang nangamatay.

Didto sa America, white Christmas man tuod sa East Coast apan pait kaayo ilang pagpuyo tungod sa winter storm nga natayming ning Paskoha. Maayo na lang kay ilang presidente sa Amerika nga si Barack Obama ug iyang pamilya didto nagsaulog sa Pasko sa Hawaii uban sa mga sundalong Amerikano.

Ang kapait sa kinabuhi sa mga Katoliko sa ubang suok sa kalibutan maoy gihatagan og dakong pagtagad sa mensahe ni Papa Benedicto.

Didto sa China, adunay Katoliko, apan ang pagka-Katoliko ginawongan sa komunistang gobyerno.

Gikan sa pagtudlo sa lider sa simbahan, pag-ordena sa obispo ug kaparian buot iyahon sa komunistang gobyerno sa China, nga daling gisupak sa Vatican.

Lahi kaayo alang natong mga Pilipino nga ang atong pagka-Katoliko wala but-i sa gobyerno, didto sa China gi-monitor sa ilang gobyerno ang kalihukan sa Simbahan. Dinhi sa ato, nahasupak sa freedom of religion nga gisugo sa atong Konstitusyon kun ang gobyerno mag-apil-apil sa kalihukan sa simbahan. Apan didto sa China, supak sa kasugoan sa gobyerno kun ang Simbahan dili moyukbo sa komunistang pamunoan.

Suwerte ba kita?

Suwerte unta kita dinhi sa Pilipinas kay gihatagan kita sa atong Konstitusyon og kagawasan sa paggakos sa atong pagtuo, apan malisod pa gihapon alang kanatong mga Pilipino ang pagpuyo sa tiunay nga pagka-Katoliko. (BANAT NEWS)