Mga bag-o sa kalibotan sa drugas

Sa duha ka sunod-sunod nga semana naka-eskor ang kapulisan sa Sugbo ug Rehiyon 7 batok sa kalihokan sa mga tigpayuhotan og ginadiling drugas. Una, nasikop sa kapolisan sa Rehiyon 7 sa may uptown area ning dakbayan ang usa ka tigpayuhotan og ginadiling drugas nga taga lungsod sa Minglanilla. Si Russel Rosales nakuhaan og usa ka kilo nga cocaine nga nagkantidad og pito (7) ka milyon ka pesos sa milabay nga semana.

Ikaduha, nasikop usab sa mga Police sa dakbayan sa Sugbo kaniadtong Lunes sa buntag ang usa ka Ms. Tampus human masakpi sa akto nga nagpayuhot og usa ka kilo nga shabu nga nagkantidad og lima ( 5 ) ka milyon ka pesos.

Ang duha nga nadakpan wala mabutang sa taas nga listahan sa mga nagpayuhot og ginadiling drugas. Bag-o pa kaha kining duha sa kalibotan sa mga nagpayuhot og drugas dinhi sa ato ug sa tibook nasud?

Tungod ning maong kalamboan giangkon ni Cebu City Police Office Director Sr. Supt. Melvin Buenafe nga ang Sugbo bagsakan na sa mga ginadiling drugas gikan sa laing mga dapit sa nasud. Tungod niini ako nabalaka nga basin ang Sugbo mahimo unyang drug capital sa nasud kun dili mabantayan pagmaayo sa kapolisan ang kalihokan sa mga durugista dinhi sa Sugbo. Hinoon sigon sa atong nakita murag epektibo pa ang gihimong kampanya sa kapolisan batok sa ginadiling drugas gani ila mang nadakpan ang duha ka mga tigpayuhotan niini. Apan kinahanglang dili molugak ang atong kapolisan sa ilang pagsunod sa kalihokan sa mga badlungon sa atong katilingban.

 Ako diay’ng pahalipayan ang mga police sa Regional Anti-drug Special Operation Task Force ug Cebu City Police office for a job well done sa pagsakmit sa mga ginadiling drugas. Hinaot nga padayonon ninyo ang tininood nga paglutos sa mga nagpayuhot og drugas.

* * *

Daghang kilay ang miisa sa dihang gipamahayag ni Mayor Michael Rama nga iyang hatagan og komendasyon ang mga police nga nakadakop ug nakasakmit sa usa ka kilong shabu nga nagkantidad og siengko (5) milyones ka pesos. Mao man gyoy gipaabot nila ang paghatag og reward money ngadto sa mga police. Nahimo naman ugod nga praktis kaniadto ni Mayor Tomas Osmeña ang paghatag og reward money sa mga police nga nakapatay og kriminal ug nakasaknit og daghang ginadiling drugas. Nakalimot sila nga dili na si Tomas ang naglingkod sa balay lungsod sa dakbayan sa Sugbo, si Mike Rama na. Busa pasensiya nalang mo.