Gawasnong prensa, hikti ayaw

Gibuksan kagahapon ang Press Freedom Week 2010 pinaagi sa usa ka freedom walk gikan sa Plaza Sugbo paingon sa Kapitolyo diin gihimo ang opening program pinaagi sa Santos nga Misa sa Capitol Social Hall.

Madungan ang usa ka semanang kasaulogan sa kagawasan sa prensa sa pagpagawas sa resulta sa imbestigasyon sa palpak nga pag-handle sa kapolisan sa hostage crisis sa Quirino Grandstand.

Bisan sa kasaulogan, wala gihapon mahilom ang panawagan sa ubang kampo nga kontrolahon sa gobyerno ang media, nunot niadtong wala mabadlong nga coverage sa mga higanteng TV network ug radyo didto sa kauluhan nga nakapasamok sa sitwasyon.

Ang panawagan nga ipakontrolar na sa gobyerno ang media aron sa mosunod nga samang sitwasyon, mahatagan na og limitasyon ang lihok sa media ug makapili na sa angay ipagawas ug sa dili angay ipagawas dayon.

Palpak sa pipila ka sakop sa media sa kauluhan ang nahimong unod sa pagsaway sa pipila ka sektor. Apan mahimo ba kining basehan aron mopanday ang Kongreso og balaod nga magbutang og hikot sa liog sa mga sakop sa media?

Wala kita sa karaang gobyerno Romano diin gipatuman ang “falsus unus falsus omnibus” nga sa ato pa, ang sayop sa usa, sayop sa tanan, ug ang tanan maoy angayang silotan.

Dakong silot alang sa mga sakop sa media sa nasud kun tinud-on ang pagbutang og “restraint” sa media.

Silot nga nagsumikad sa palpak nga wala tuoya. Palpak nga gitapak sa laing palpak – ang palpak sa mga polis sa Pilipinas nga nasalida sa mga telebisyon sa tibuok kalibutan.

Ang silot sibo lamang sa mga nangasayop. Apan kun silotan lakip ang wala masayop, usa na kini ka matang sa pagpangatake sa katungod nga dugay nang gi-amuma ning nasud nga naghari ang demokrasya.

Apan dili silot sa nasayop nga mga sakop sa media ang pagputol sa maong katungod sa gawasnong pagbalita pinaagi sa balaod. Usa kini ka tinuyong kagustohan sa pipila nga anaa sa gahum aron gawongan ang kinatibuk-ang media sa nasud.

* * *

Giawhag ang mga graduates sa Bulacao Community School Batch 1991 sa pagtambong sa 1st General Reunion nga pagahimuon karong Septiyembre 25, 2010.

Kadtong mga graduate sa maong tunghaan sa maong tuig nga buot magpakisayod sa umaabot nga kalihukan, mahimong matawgan si Junah Babatuan-Abellanosa sa mobile phone 0905-2795429 o Roel Basera sa mobile phone 0932-2314099 o Evelyn Benting Villegas sa mobile phone 0910-8762105.

Mga panghinaot nga magmalampuson kining maong panagtigum sa mga graduates sa Bulacao Community School.

Ang pagbalik-lantaw sa kagahapon motabang og panday sa atong ugma!