EDITORYAL - I-apil ayaw sa kalagot ang mga Daanbantayanon

CEBU, Philippines - Kun panimalos ang tuyo ni Gobernador Gwendolyn Garcia sa iyang pagpangasaba ngadto ni Daanbantayan Mayor Maria Luisa Loot, apan kun tipik sa iyang panimalos mao ang pagpa-puasa sa mga Daanbantayanon, usa kini ka dakong sayop nga lakang ug sayop nga pamaagi sa politika.

Mahimong magka-away ang isi’g ka opisyal sa lalawigan ug sa lungsod, apan nungka nga i-apil sa away ang mga tawo, ang mga konstituwente nga giserbisyohan sa maong mga opisyal.

Bisan isipon pa ni Garcia si Loot nga mortal niyang ka-away, apan dili niya mahimong isipong ka-away ug yam-iran ang mga residente sa Daanbantayan.

Maayong pahinumdoman si Garcia nga ang mga konstituwente ni Loot sa Daanbantayan iya usab nga mga konstituwente nga dili niya matalikdan bisan sa personal niyang kabangian tali sa mayor sa lungsod.

Si Mayor Loot miduol kang Garcia dili aron pagpangayo og tabang alang sa personal niyang katuyoan, apan nangayo kini og hinabang sa Kapitolyo aron mapundohan ang Haladaya Festival sa Daanbantayan, nga dili festival sa mga Loot, kun dili festival sa mga residente sa Daanbantayan.

Nasayod na ang gobernadora nga usa ka gastoso nga kalihukan ang Pasigarbo sa Sugbo ug nga naglikay ang kagamhanan sa Daanbantayan nga makagasto niini tungod sa kadaghan sa gastohanan sa lungsod ilabi na nga usa na kini karon ka first class municipality.

Ang Daanbantayan wala mag-inusara. Adunay daghang lungsod nga wala mo-apil sa Pasigarbo sa Sugbo tungod kay, sama sa Daanbantayan, gi-usikan usab sila sa paggasto og P1 milyon alang sa maong kalihukan.

Apan si Loot lamang ang iyang nabuthan tungod kay mao kini ang adunay ka-isog nga mobarog alang sa iyang mga konstituwente.

Kun si Garcia mi-personal na sa away niya kang Loot, usa ka mapa-ubsanong hangyo kaniya nga dili i-apil sa mao niyang kalagot ang kang Loot ug iyang mga konstituwente sa Daanbantayan.