Mas priority diay ang mga sakyanan kay sa drainage, tambal ug garbage collection?

Pagkadaghang problema sa atong dakbayan. Daghan kaayo nga maglibog kita hain ug unsa ang unahon pagsolbad. Maoy hinungdan nga kinahanglan i-prioritize ni Mayor Mike, kun unsa ang unahon pagtagad.

Drainage, city hospital, squatter, garbage collection – pagpalit og dugang garbage trucks, kadalanan, sidewalk vendor, traffic, kriminalidad, uminto sa sweldo, pagpatahom sa dakbayan, pagpaagas sa tubig 24 hours a day, sugang dagitab sa kadalanan, school buildings, barangay ug mga feeder roads – labina sa mga mountain barangays, ug daghan pa kaayo. 

Apan, unsa may giuna ni Mayor Mike? Pagpalit og 20 ka brand new (brand new gyud), nga sakyanan alang sa 20 nila department heads. Alang sa Mayor, top priority kini, otherwise, dili sila makahatag sa hingpit nga public service. .

Ang maong mga sakyanan alang sa atong mga sulogoon, mikabat og 27 milyones ka pesos. kanako. Kadaghan ining kwartaha? Salapi kini sa lungsod. Apan, sila nga atong mga sulogoon maoy nagpahimulos.

Apan, sige na lang, wa na tay mahimo ini. We are in a democracy .. ila kining katungod ug pribilihiyo. In a democracy, sila maoy hawod. Mao ni ang ilang giingon nga: Magbuot mo? Mao ni ang matang sa demokrasya sa atong nasud. Kinahanglan maoy unahon ang ilang mga panginahanglan, uwahi na ang lungsod.

Ang giingon nga Bayan Muna, sulti lang ni. Slogan lang ni. Kutob ra ni sa mga speeches ug press releases. Ug applicable lang panahon sa kampanya.

Kanus-a gyud kaha ta makaangkon no og tiunay nga mga alagad sa lungsod ? Kana bang mga alagad nga makaalagad bisa’g dili brand new ang mga service vehicles !

Tan-awa ning atong mga sakop sa konseho ug sa provincial board, luho kaayo’g mga sakyanan nga dili ila. Maoy atong nasinati nga tapus sa eleksyon, una nilang agenda mao ang pag-inventory sa ilang mga sakyanan, aron kailisdan og mga bag-o ang mga daan nilang sakyanan. Kay kono, mahal na kaayo ang maintenance, ug kalas na kaayo sa gasolina o krudo. Mora’g husto paminawon. Apan, priority ba kini?

Si Senador Ted Kennedy, giingon nga mag-taxi lang inig tambong niya sa session. Ug tungod kay taxi, walay wangwang. Lagmit mao usab kini ang ubang kadagkuan sa Amerika. Wala mosulod sa ilang ulo ang ilang pagka-opisyal sa labing dakung nasud sa kalibutan. Kita dinhi, labing gamay ug labing kabus nga nasud, dagku kaayo’g ulo ang atong mga opisyales sa gobiyerno (gawas sa mga maayo ha!). Lisud kaayong duolon.

Si Don Sergio Osmeña, sa iyang pagka-Presidente, puli ni Quezon, didto sa Amerika, wala mosakay og limouisine, mi-check in og baratuhon nga hotel, mora la’g pension house. Gibadlong siya sa protocol officer, kay dunay luxurious nga mga hotel didto alang sa mga heads of state. Tubag ni Don Sergio: “How could I, when so many of our countrymen live in such in misery as they do.”

Mahimo kaha ni sa atong mga konsehal ug mga department heads sa dakbayan?

Brand new gyud og mga sakyanan! Magbuot mo?