Paita ninyo uy!

Kun walay mahitabo, walay mohimo’g aksyon.

Kini maoy pait kaayo palandungon nga batasan sa uban natong mga opisyal. Pabutangan kuno sa dakbayan og mga safety warning signs ang mga karsada diha sa Trans-Central Highway.

Pastilan, paita. Kun mao man kini, makaingon tingali kita nga makaayo diay nga dunay aksidente kanunay kay mahimoan man og aksyon ang mga kakuwangan.

Usa ka dapit diha sa sitio Maracas, Lahug, kanang likoon nga bahin sa karsada nga naglugsong gikan sa Marco Polo Plaza Hotel angay unta nga butangan og safety warning signs.

Lugsongon kanang maong dapit og likoon pa g’yud sa tuo, dayon moliko na usab sa wala. Kun dunay sakyanan diha nga kusog nga magdagan ug nga ang drayber dili suheto, sigurado g’yud nga maaksidente.

Sa bag-o pa ko nga nahimong reporter, nakaresponde ko kaniadto og aksidente nga binanggaay diha sa maong dapit. Kanus-a man kini mabutangan og warning signs, unya na ba kun may mahitabo na usab nga aksidente?

* * *

Sama god nianang mga balay nga gitukod daplin sa kasapaan, tan-awa kun dunay maaksidente kanila ang atong mga opisyal modali-dali na usab unya na sila pagpahiklin sa maong mga pamilya.

Pagka wala g’yuy nada sa atong mga opisyal nga ingon niini og baruganan.

Si Mayor-elect Mike Rama ako g’yud nga gipakita sa hulagway sa usa ka payag nga anaa gitukod ibabaw g’yud sa Mahiga Creek nga kuyaw kaayo nga maanod kun kusog ang baha.

Apan hangtud karon wala pa g’yud sila’y gihimo. Karong Hunyo 19, Sabado, laing coastal ug river clean-up ang ipahigayon dinhi sa dakbayan apan wala malakip sa plano ang pagpangguba sa mga illegal structures diha sa kasapaan.

Paminaw ko, karong Biyernes magpa-presscon na usab ang Coastal Management Board (CMB) sa balik-balik ra nga mga isyu. Napul-an na kaayo ko nga maminaw sa mga isyu nga ilang pagahisgotan.

Ang nindot g’yud unta mao nga ang lihok maoy pasultihon ug dili kay ang sulti maoy pabuhaton. Sabtan ba ninyo?

* * *

Sama ra god nga kining mga sidewalk vendors nga anaa gayud maninda daplin sa karsada, kun dunay sakyanan nga magdagan unya mawagtangan og preno, sigurado man g’yud nga sila mangamatay.

Dayon, reaksyon na usab nga papahawaon ang maong mga vendors sa aseras. Pait! Hain na man ang mga sakop ni Gerry Marquez, ang nagbunyag sa iyang grupo kaniadto nga “Mayor’s Squad.”

Apil ra ba kamo sa gipasabot ni Mike Rama nga dili maayo alang kaninyo nga maghimo’g poste diha sa Plaza Sugbo. Kasabot ba kamo sa iyang gipasabot?

Duna kuno’y sakop sa Barangay Intelligence Network (BIN) nga aksidente nga mibuto ang iyang armas diha sa dalan Colon.

Nagmatuod kini nga daghan g’yud sa mga BIN nga magdala-dala og armas. Aw ako hinoon, nakabantay man g’yud nga daghan kanila ang nagpabugol-bugol sa armas diha sa ilang kilid.

Pipila nako ka mga higala nga BIN lisensyado hinoon paghupot og armas, apan daghan usab nga wala. Nahinumdom ba kamo niadtong sakop sa BIN nga nakapusil? Unya wala diay lisensya?

Ang akong awhag g’yud sa mga sakop sa BIN nga likayan g’yud unta ninyo ang pagdala-dala og armas nga walay lisensya. Law-ay kaayo huna-hunaon nga motabang mo pagpanakop apan kamo usab diay dakponon.