Diskarte ni Binay

Wa’ pa makalingkod sa ilang pwesto apan nagsugod na pagbukal ang panaglalis sa duha ka mga dagkong opisyal sa nasud. Niadtong wa’ pa makahurar, daan nang gipadangat ni Vice-President elect Jejomar Binay nga buot niyang makab-ot ang pwesto isip kalihim sa Department of Interior and Local Government. Apan karon palang, gitataw na ni President-elect Benigno ‘Noynoy’ Aquino nga di’ mahatag kang Binay ang gipangayo niini nga pwesto. Kung tan-awon, di’ lang pwesto sa DILG ang isyu, apan anaa sa prinsipyo sa duha ka mga mosunod nga dagkong opsiyal sa nasud.

Humot ang DILG sa mga tawo nga nag-ambisyon og taas nga pwesto sa gobyerno. Direkta ang koneksyon sa kalihim sa maong departamento sa mga lokal nga opisyal, sama sa mayor ug gobernador ug mga pulis sa matag lokal nga kagamhanan. Matag lakang ug kabag-ohan nga himuon sa usa ka kalihim sa maong buhatan, dako na ni og mahimo sa libuan ka mga empleyado. Alang sa usa ka politiko nga nagplano og mas taas nga pwesto, ang DILG ang tukmang buhatan aron palapdan ang impluwensya ug palapdan ang pagkombensir nga mopaluyo nila sa panahon nga modagan na sa labing taas nga pwesto.

Nakat-on na si Aquino o ang partido Liberal sa mga diskarte ni Binay giunsa niya sa pagkuha ang ikaduha sa labing taas nga pwesto. Kung ihatag kang Binay ang DILG, mura lang og nagkuha og bato si Aquino ug gipukol sa iyang ulo. Kung nagtan-aw si Aquino sa politikanhong kaugmaon sa iyang naparot nga runningmate nga si Mar Roxas, di’ niya hatagan og higayon si Binay nga makapatuyang sa iyang impluwensya aron matuman ang mga plano niini sa 2016 nga piniliay. Kung nagtan-aw si Aquino sa sunod nga lakang ni Roxas, nga tuyong nipadailis aron siya ang ituboy nga presidente, di’ mahimong hatagan niya og dakong katungdanan iyang bise presidente.

Daghan mga political analyst ang nakadayeg sa mga lakang nga gihimo ni Binay aron makab-ot ang iyang damgo nga makuha ang usa ka dakong posisyon. Gigamit ang kaadunahan sa Makati aron makig-alayon sa giingong kapin 200 ka mga LGU ng gihimong igsuon nga lungsod ug dakbayan sa Makati. Nakig-alayon sa Binay sa mga LGU labi na panahon sa trahedya aron matabangan. May mga LGU’s pa nga nakadawat og livelihood program ug uban pang mga proyekto gikan sa Makati. Ang mga LGU ang nituboy ug nipaluyo ni Binay sa adlaw nga siya na usab ang nangayo sa ilang tabang. Wa’y bisag usa ka politiko ang nakahimo sa susamang diskarte ni Binay.

Gawas sa pagkuha sa suporta sa iyang mga kauban sa fraternity nga APO, gihimo ‘sab sa mga supporter sa labing adunahang syudad sa Makati, ang pagpanghatag og sample ballot nga nagbitbit sa iyang panga’n isip bise presidente sa tanang nikandidato pagka-presidente. Wa’ malantawi sa kampo ni Roxas o ni Legarda ang maong matang sa kampanya ni Binay. Di’ mahimong akusahan ang vice president-elect nga nanikas aron makab-ot ang ikaduha sa labing taas nga pwesto. Apan mahimo siyang akusahan nga nagminaro aron makuha ang iyang damgo nga moabot sa maong pwesto nga wa’ na moagi og uban pang posisyon.

Karon, may igong rason si Aquino nga di’ ihatag ang pwesto sa DILG nga makapalig-on pa sa impluwensya ni Binay og mao pay mobanig sa iyang da’n paingon sa labing taas nga pwesto sa 2016. Kung ihatag ni Aquino ang DILG, nagpasabot ni nga pabor siya nga si Binay ang mohulip niya human sa unom ka tuig gikan karon. Kung plantsahon ni Noynoy ang da’an alang ni Binay, nagpasabot ni nga supak siya nga iyang runningmate nga si Roxas ang mosunod sa pwesto. Ang isyu sa pagtudlo ni Binay isip kalihim sa DILG imposibleng mahitabo alang sa usa ka bag-ong administrasyon nga una nang naapsan ang diskarte ug nalabwan ang mga lakang aron makuha ang usa ka pwesto.

Email: [email protected] or [email protected].