Una nilang lakang

Unang gihimo ni Bill Clinton dihang nidaog isip ika-42 nga presidente sa Estados Unidos: Gibatokan ang terorismo gikan sa ubang kanasuran ug giggubat ang warlords sa Somalia ug war criminals sa Yugoslavia. Si Clinton nga nasublian sa White House sukad ni Franklin Roosevelt malampusong nisulbad sa ekonomikanhong krisis nga gibilin ni Ronald Reagan ug nipalambo pag-ayo sa Amerikanhong ekonomiya.

Sa iyang bahin, si Gobernador Gwen Garcia niggahin sa unang mga adlaw human naproklamar sa ikatulo ug kataposang termino sa pagsige og reklamo nga gamay rang iyang mayoriya ug posibleng tikas maoy hinungdan nganong wa makuha ang usa ka milyon ka boto nga iyang gisaad ni Gibo Teodoro.

* * *

Ang labing batan-on nga primero ministro sa Britanya sa ika-20 nga siglo, si Tony Blair, kusganong nibarug ug nanalipod sa katungod sa pagpakisayod ug nitanyag sa iyang kaugalingon pagpangunay pagpasabot ug pagpanalipod sa mga lakang sa iyang pamunoan, labi na sa mga alyansa sa ubang kanasuran nga iyang gisudlan. Si Blair ang labing aktibong tigpaluyo sa gubat ni Clinton sa Yugoslavia ug sa ikaduhang gubat sa Iraq nga gilusad ni George Bush Jr.

Si Cebu City Mayor-elect Mike Rama, sa iyang labing unang pakig-atubang sa mga kawani sa City Hall human naproklamar, nipasidaan pagtaktak sa mga kawani nga nangampanya batok niya.

* * *

Sa iyang pag-asumir isip labing tiguwang nga presidente sa South Africa niadtong 1994, si Nelson Mandela hingpit nga nibungkag sa apartheid--nga nihikaw sa kinabag-an nga mga itom sa ilang balaanong katungod sa pagpili ug nipalabi sa pipila lang ka mga puti--ug nahimong inspirasyon sa kalibotanong pakigbisog batok sa inhustisya.

Dihang natino na ang iyang kadaogan isip sunod nga presidente sa Pilipinas, si Senador Noynoy Aquino kusganong nanalipod sa iyang pagdumili pagbiya sa bisyo sa pagpanigarilyo ug sa pagpasalig nga di niya palayason apan di sab himuong first lady si Kris, ang iyang manghod nga artista.

* * *

Si Cory Aquino wa mag-usik og panahon human nabungkag ang diktadura ni Ferdinand Marcos human sa malinawon nga people power revolution sa Edsa niadtong 1986. Ang una niyang mga lakang nihimakak sa mga pasangil nga wa siyay nahibaw-an ni kaisog sa pagpatuman og bisan unsang makahuloganon nga kausaban. Iya dayong gitukod ang rebolusyonaryong kagamhanan, giusab ang malupigon nga batakang balaod, gitangtang ang nahibilin nga mga gaway sa balaod militar ug hingpit nga gibanhaw ang tanang demokratikanhong mga institusyon.

Susama ang kakalit sa pagtungtong sa Malakanyang ni Pres. Arroyo. Siyay nipuli sa pamunoan ni Joseph Estrada nga gipalagpot sa Edsa Dos niadtong 2001. Sa iyang unang adlaw sa katungdanan, si Arroyo nitudlo dayon ni Winston Garcia isip presidente ug general manager sa Government Service Insurance System (GSIS).

* * *

Email:[email protected]