1M votes for Gibo, 1M for Villar, 1M for Noynoy, 1M for Erap?

Asa man ta mangitag 4 million votes dinhi sa lalawigan ug dakbayan sa Sugbo, alang sa upat ka kandidato pagka-Presidente? Ug tagpila na man lang sila si Gordon ug Perlas, tag-100 votes na lang?

Bida sag ngano uy? Samtang ning panahon sa eleksyon, tanang matang sa pamakak ug pangilad ang buhaton sa atong mga politiko ... apan kining mga saad nga mo-deliver og tag 1million votes sa matag kandidato pagka-Presidente, subra ra sad ni.

Lagpas ra kaayo.

Nagpasabot ra gyud ni nga maoy ilang pagtuo nga motuo kanila ang katawhan.

Unsay ilang pagtuo sa mga tawo, mga ugok? Nahimong kataw-anan ang maong mga pamutbot. Sa ato pa, walay mituo kanila. Ug sayud sila niini.

Unya locally, mao sad ... ang tanang kandidato pulos makadaug, kun silay pasultion. Maoy hinungdan nga nanagan silang tanan tungod kay walay usa kanila, mapilde.

Pastilan, maayo pa si Sonny Osmeña, kay nahibawo siya nga wala siyay dag-anan ni Mike Rama, mi-withdraw sa iyang kandidatura. Hinoon, right from the start, nahibawo si Sonny nga tungod kay dugay-dugay na siyang nawala sa limelight, maglisud na siya’g balik sa pamolitika. Ug matud pa sa mga tigpaniid, joke lang tong iyang pagdagan-dagan pagka-mayor.

Mao sad unta ni ang himoon sa ubang mga kandidato nga ilang na-felt ang kapildihan, Maka-sense man ta ini ba! Una sa tanan, lupig gyud ta sa mga incumbents. Gawas kun grabe kaayo ang isyo batok sa mga anaa sa gahom.

Sa unang mga eleksyon, daghan kaayong mga instances nga mapukan ang mga incumbents, gumikan sa mga isyo. Ug kun poor ang performance sa mga magpasubli.

Pananglitan, without going into the details, unsa man ang performance sa mga incumbents sa dakbayan sa Sugbo? Poor ba kaayo? Wa ba silay nahimong maayo alang sa mga molupyo sa dakbayan sulod sa ilang pagpangagamhanan?

Ug sa lalawigan, unsa man ang mga isyo batok sa mga namunoan? Limpiyo ba? Wala bay mga anomaliya?

Karong eleksyona, dakung isyo ang korupsiyon. Ang matag kandidato pagka-Presidente, silang tanan mipasalig nga ilang wagtangon ang korupsiyon sa ila unyang pagpamunoan. Ug kumusta man ang lalawigan sa Sugbo, naduhig ba sa isyu sa korupsiyon? 

Mao kini ang atong bantayan! Kinahanglan atong ayagon pag-ayo ang mga isyu, ilabina mahitungod sa korupsiyon.

Ug balik sa atong ulohan, asa man ta mangitag 4 million votes nga gipasiatab nga i-deliver ngadto sa mga presidential candidates?