Panglawas, lehitimo nga isyu sa piniliay

Ang pagpangulo usa ka bug-at nga trabaho. Dinhi halos tanang bahin sa imong lawas ug utok gigamit busa dili puwede sa hinay na og lawas. Makaapekto man ugod sa hukom ug dinaliang serbisyo ang kahinay sa lawas maong usa gayod ka lehitimong isyu sa piniliay ang kahimsog sa panglawas ilabi na ang mental nga kapasidad sa usa ka kandidato busa dili kini angay nga ibaliwala lamang.

Ning bag-o nahimong isyu ang mental nga kapasidad ni Noynoy Aquino tungod sa giingong psychiatric record niini ug ang dili masabot nga batasan. Gani dihay higayon matud pa ni Bel Cunanan, columnist sa Philippine Daily Inquirer nga ang mga mayor sa Tarlac mitug-an nga atol sa Tarlac Festival samtang ang mga mayor kauban ni Noynoy Aquino nag enjoy sa halo-halo nga gidalit kanila kalit lamang mihuyop sa halo-halo niini paingon ngadto sa nawong sa iyang higala ug mibahakhak sa pagkatawa.

Ang psychiatric record ni Noynoy gipanghimakak sa iyang kampo ug mirason nga peke kini ug dili tinood. Apan kinsa ba ang motoo kun mao lamang kini ang himoon sa iyang kampo. Ang mga tawo nga nagduda na sa mental nga kapasidad ni Noynoy dili matagbaw sa mao lamang tinubagan sa isyu kun dili kini niya kuyogan og psychiatric test. Busa kun akoy Noynoy akong isumiter ang akong kaugalingon ngadto sa usa ka psychological o psychiatric test aron maputol na ang mga pagduda sa akong mental nga kapasidad, di ba?

Kun ugaling magdumili ang senador sa pagsumiter sa iyang kaugalingon ngadto sa nahisgutan nang examination, then di ta makabasol sa mga tawo nga motoo nga aduna siyay deperinsiya.

Sa sunod piniliay mas maayo seguro nga dili lang ipaubos sa drug test ang mga kandidato, kinahanglan usab silang ipaubos sa psychological o psychiatric test kay kun ang mga huwes, police, sundawo ug uban pa ang pangulo pa kaha sa nasud nga anaa kaniya nakasalalay ang sobra 92 milyones ka mga Pinoy?

* * *

Sakto si Gilbert Remulla sa iyang lakang nga kun mapili nga senador iyang hingusgan ang paggamit ug pagpalig-on sa Renewable energy source sa nasud ug ang paghatag og insentibo ngadto sa mga investors aron malikayan sa umaabot ang susamang suliran sa kakuwang sa supply sa enerhiya nga nasinati nato karon.

Ang environmentalist nga kanhi kongresista gusto usab nga magamit ang Geothermal Energy Source tungod kay makahatag kini og dakong supply sa enerhiya ug elektrisidad gawas nga makaminos kini sa carbon dioxide emissions ug climate pollution.