Da best in da Pinoy!

Mao ni nakaayo natong mga Pinoy, kay taliwa sa daghan natong mga salawayong kinaiya ug mga buhat, apan, panahon sa katalagman, anaa kanato ang tumang ka-lumo sa kasingkasing, ka-maluloy-on ug ka-manggihatagon.

Mao kini kita. Taliwa sa kangil-ad usahay sa atong mga batasan, sa atong pagka-libakira ug pagka-tsismosa, sa atong   pagka-palaaway ug pagka-bintahuso, sa atong pagka-hakug sa mga komisyon ug over-pricing, sa atong pag-lying, cheating ug stealing …. taliwa niining tanan, mogimaw gyud ang atong katarong ug kaligdong panahon sa mga katalagman.

Ato na kining namatud-an sa daghang mga higayon nga nahiagom kita sa bisan unsa na lang nga matang sa krisis ug kasakitan nga midangat sa atong kinabuhi.

Ug karon … gumikan ni Ondoy, gitandog na usab ang atong mga kasingkasing, nagkahiusa kita, nagtinabangay, ug gihiklin lang una ang panagbangi sa politika, ug gikalimtan ang dautan natong mga kinaiya.

Literally, milihok kitang tanan. Aron pagtunol sa atong tabang ngadto sa atong kaigsoonan sa Luzon … sa atong gitawag nga Imperial Manila. Maoy mipatigbabaw ang atong pagka-Pinoy. Magsuon kitang tanan. Pinoy kitang tanan.

Daghan nang mga katalagman ang midangat sa nagkalainlaing dapit sa atong nasud, ug nakabangon kitang tanan, gumikan sa pag-usa sa atong kusog aron makabangon.

Ang media, ang business community, ang Simbahan, ang mga tunghaan, ang mga estudyante, ang nagkalainlaing kahugpungan, of course, ang kagamhanan mismo, practically, kitang tanan, mitunol sa bisan unsa nga ikatabang sa mga nabiktima ni Ondoy.

Dalaygon kaayo. Unta, magpadayon kini bisag walay katalagman nga mohapak kanato. Ug ang mga langyaw, dakung natingala nga taliwa niining hitaboa, maka-afford gihapon kita pagkatawa. Onli n da Pilipins. Only Pinoy. Maglisud sila’g sabut ning maong kinaiyaha. Dili sila motuo nga ingon kita niini, mokatawa taliwa sa kalisud, gumikan sa atong kaduol sa Ginoo.

Sila god didto, kwarta ra may gadaghan, apan daghan kanila ang wala motuo og Ginoo, hinungdan nga pulos artificial ang ilang mga kalipay, pulos lawasnon ug kalibutanon. Mao nga daku ang ilang katingala ngano nga sa ka-grabe sa kadaut nga gihatag ni Ondoy, smiling gihapon ang mga Pinoy.

Onli n da Pilipins! Only Pinoy! Apan, iniglurang niining tanan, padayon sa atong pagpinahitay sa politika. Onli n da Pilipins gihapon.