Sayop sa proseso

Layo pa og abtan ang kontrobersiya nga nitumaw sa Lindogon sa lungsod sa Sibonga, ang nahimutangan sa usa sa labing gidugok nga pilgrim site sa Archdiocese of Cebu. Makakugang ang mga nanggawas nga rebelasyon gikan sa usa ka kanhi sakop nga Monghe sa Marian Monks of the Eucharistic Adoration. Salamat sa pagsalig nga gihatag sa ABS-CBN News ug iyang gibutyag ang matod pa, mga kahiwian nga nahitabo su’d sa usa unta ka sagrado nga lugar.   Ang tanan nga gipangbutyag sa kanhi sakop sa congregation nga mas nailang si Brother Paul nibahin sa huna-huna sa katawhan, labi na sa mga deboto, kun mutuo ba o dili.

 Wa’ makaikyas sa mga rebelasyon sa kanhi monghe ang matod niya, grabeng pangwarta nga nahitabo sa monastery. Wa’ motuhop sa akong huna-huna ang maong tataw nga pagpangayo’g limos kaniadto. Apan sa dihang akong nahinabi sa personal ang maong monghe, didto pa nisu’d sa akong huna-huna ang mga giingong kahiwian nga gihimo sa simbahan. Bisan asa ka molingi, adunay mga dapit nga gibutangan og karatola diin pwede kang magpamisa. Wa’y pugsanay apan sama rang gitulis ka tungod sa kadaghan sa mga booth nga moatiman sa imong mga pamisa, pa-ampo ug mga petisyon. Sa gawas ug su’d nga bahin sa simbahan, nahimutang ang klase-klaseng imahen sa mga santos. Sa ubos sa matag rebolto, adunay buslot diin mahimo nimong ibutang ang imong limos.

Apan wa’ pa diha matapos ang giingong pagbitik sa kuwarta sa mga deboto. Sa gawas nga bahin adunay gitawag nga wishing well, atabay kun diin molabay ka og sinsiyo nga kinahanglan nga maigo ang kampana. Kinahanglan nga mobagting ang kampana sa imong paglabay sa sinsiyo.   Sa maong paagi, matod pa, matubag ang imong mga pag-ampo ug mga pangindahay. Makapakugang ang ‘color coded’ nga mga kandila nga mapalit sa tag traynta pesos matag usa. Depende sa imong intensyon sa kahitas-an ang color sa kandila nga imong paliton. Di’ ba buhat sa mga paganismo ang maong matang sa proseso? Kanus-a man nahimong color coded ang atong pag-ampo nga kung wa’ magtugma ang color sa kandila sa imong intensyon nga gi-ampo, di kini dunggon sa kahitas-an. Mao ba ni ang buot ipasabot sa mga monghe sa Lindogon?

Kung may kamatuoran man ang akusasyon sa matod pa, homosexual acts nga nahitabo sa su’d sa monastery, angayan nang maalarma ang kadagkuan sa katolikong simbahan. Ang usa ka grupo nga giisip nga mas dako pa ang oras nga igahin sa ilang pag-ampo, karon gi-akusahan nga dakong oras pa ang igahin sa pag-ihap sa mga kuwarta nga ilang makolekta gikan sa publiko. Ang grupo sa mga kalalakin-an nga wa’y laing himuon gawas sa pagsunod sa mando sa simbahan, karon giakusahan nga nakig-relasyon sa isig usa nila ka lalaki. Di’ ba makalilisang ang maong mga akusasyon?

Apan daling nakatubag ang kadagkuan sa Archdiocese of Cebu nga di’ sila pwedeng mag-imbestigar base sa mga huhungihong lamang. Gikinahanglan nga adunay tawo nga motumaw aron sa pagpadangat sa reklamo una pormal nga kasugdan ang imbestigasyon. Apan di’ pa diay igo nga imbestigahon ang maong kontrobersiya bisan kun nakahatag na ni og dakong disturbo sa huna-huna ug pagtuo sa liboan ka mga tawo nga nakaduaw ug nisalig sa maong grupo? Di’ ba igo nga may usa ka monghe nga nigawas aron sa pagbutyag sa giingong iyang mga nahibaw-an kabahin sa mga di’ maayong nahitabo sa su’d?  

Di’ matago nga may kahiubos ang maong monghe sa kadagkuan sa simbahan tungod sa paspas nga pagpagawas sa desisyon nga naglangkat kaniya sa grupo sa mga relehiyoso. Apan di’ ba igo ang iyang mga testimoniya aron lilion sa simbahan kun may kamatuoran ba ang tanan? Kun pulos bakak ang iyang gipanulti, angayan lang nga sudyaan siya sa katawhan ug paninglan sa kahitas-an sa iyang nabuhat. Apan kun may kamatuoran ang iyang gipangyawyaw, nganong di’ man silutan ang mga tawo nga nalambigit sa salaod aron sa maong paagi, mahatagan og hustisya di’ lang ang monghe nga nibutyag niining tanan, apan lakip na ang mga tawo nga nisalig ug nisuporta sa maong kongregasyon. Ang tinuod nga nituo sa kahitas-an, di’matarug kun ang mga tawo nga nibukas ug nimintinar sa maong lugar masangit sa kontrobersiya. Apan ang tinud-anay nga relasyon ana-a nimo ug sa kahitas-an bisan unsa pang matang sa buling ang ilabay sa imong relihiyon o grupo nga imong gisakupan.