Unsay mga butang nga dili matagna sa tawo?

Daghan mga butang ang matagna kun mahibaw-an sa tawo ning kalibotan. Sama pananglit sa bagyo, mahibaw-an dayon kini sa Pag-asa ug ikataho dayon kini ngadto sa katawhan alang sa ilang pagpangandam.

Ikaduha, ang kakulang sa pagkaon sa usa ka tawo mahibaw-an kini niya kay batyagon man niya ang kagutom.

Ikatulo, sa natad sa negosyo mahibaw-an sa negosyante kun alkansi ba siya kay mapordoy man siya. Ikaupat, mahibaw-an sa tawo kun hapit na moulan kay habolan man sa mabagang dag-om ang kalangitan.

Ikalima, kun masipyat ug masayop kita ngadto sa atong isigkatawo mahibaloan kini nato kay kasuko ug pagkawalay maayong pagtagad ang maani nato gawas kun mangayo kita'g pasaylo. Daghan pang butang dinhi sa kalibotan ang mahibaw-an nato in advance.

Apan adunay mga butang usab nga dili nato mahibaw-an bisan pag unsaon nato.

Una, ang linog dili gyod mahibaw-an sa tawo kay mokalit man lang kini sa pagbutho inuyog ang atong palibot.

Daghan nang mga tawo ang nangamatay sa linog. Ikaduha, ang kilat ug liti dili usab nato mahibaw-an kun kanus-a kini mo-strike. Labaw sa tanan, ang kamatayon sa tawo dili gyod mahibaw-an in advance. Mao bitaw nga daghan nang mga tawo ang wala na makamata inigkabuntag.

Ang aksidente sa kadalanan, kahanginan ug kadagatan dili usab kini mahibaloan in advance.

Daghan nang mga tawo ang nangakalas sa aksidente sa kadalanan, kadagatan ug sa kahanginan.

Busa, kinahanglan gyod nga kitang tawo mag-ampo sa kanunay ngadto sa Diyos nga hatagan unta kita Niya og kabaskog sa kalawasan ug hataas nga kinabuhi ug ilikay kita Niya sa mga aksidente ug mga disgrasya sa adlaw'ng tanan.

Gawas sa pag-ampo sa kanunay magpasalamat usab kita ngadto Kaniya sa mga grasya ug mga kaayohan nga nadawat nato sa adlaw'ng tanan.