Wa pa man kahay campaign period!

CEBU, Philippines - Ambut unsa ning klaseha sa balaud nga nag-ingon nga dili maisip nga electioneering kining pangampanya karon pinaagi sa mga Radio-TV commercials tungod kay wa pa kunoy campaign period.

Makalibog no? Bisag klaro kaayo nga nangampanya na kini sila, apan tungod lagi kuno kay wala pay campaign period, mahimo nang mangampanya, basta di lang moingon nga “vote for me.” Samot kalibog, di ba Dro?

Ato ning tinambanon pag-kwenta: Naa ron sa mga telebisyon ug radyo, dugay na ni, ang nagkalainlaing commercial nga nagpakita sa mga nahimo ug mga plano sa buot molansar karong eleksyon sunod tuig. Ug tungod kay wala sila muaghat pagpabotar kanila, wala kini isipa sa Comelec nga pangampanya tungod kay wala pay campaign period. Busa, tungod kay wala pay campaign period, mahimo diay nga mangampanya basta di lang moingon nga “vote for me.”

Maoy hinungdan nga tungod kay wala pay campaign period, mahimo nga mangampanya basta di lang ka muawhag nga botohan ka. Klaro na.

Apan, sa ato nang gihisgutan dinhi, kun kining mga Radio-TV commercials sa mga politiko, dili maisip nga pangampanya, unsa man diay ni sila? Information drive lang? Apan, nganong karon pa man sila nag-information drive? Nganong wa man sa miaging tuig? Ug nganong karon pa man nga nag-angat na ang eleksyon?

Bisag unsa ka bulok sa tawo, bisag unsa ka hanggaw sa tawo, kining mga radio-tv commercials karon sa mga politiko, usa na gyud ka matang sa pangampanya. Sa ato pa, nganong gi-allow man kini sa Comelec?

Ug kining ilang giingon nga mga “friends” sa mga politiko nga maoy nibayad sa maong mga RADIO-TV commercial, kinsa man ni sila? Nganong di man ibutyag ang ilang mga ngalan, nganong “friends” ra man, aron unta ato silang mailhan unsa ka daghan ang ilang kwarta nga naka-afford man sila'g minilyon ka pesos pagbayad sa maong mga radio-tv commercial? Sila ba gyud ang mipirma sa mga advertising contract?

Mangutana ta'g usab, wa pa man kahay campaign period, nganong sige naman sila'g pangampanya pinaagi sa mga radio-TV commercial? Ug kun kining maong mga radio-tv commercial (pakapinan pa'g mga tarpaulin), dili maisip nga mga campaign material, unsa man diay ni sila?

Unfair kaayo ni sa mga pobreng buot mokandidato nga walay daghang kwarta ibayad sa mga commercial, di ba Mr. Comelec? Hinoon, alang sa Comelec, wala sila'y kasal-anan nganong pobre kining ubang buot magkandidato.