Nganong na-"mardi gras" man ang Sinulog?

Ang akong 1957 Modern American Dictionary, mihatag ning mosund nga kahulogan sa Mardi Gras: “Last day before Lent, celebrated in New Orleans, etc, with festivities.”

Ang Collins English Dictionary, sa laing bahin, nagkanayon usab:“Festivities of Shrove Tuesday (Ang Shrove Tuesday is the Tuesday before Ash Wednesday, unang adlaw sa Lent).

Samtang ang Lexicon Webster Dictionary, sa Grolier Book of Knowledge: mihatag usab ning mosunod nga meaning: “Shrove Tuesday; the last day of the carnival, celebrated in Paris, New Orleans and other cities, with parades & special festivities.”

Ang tulo ka diksiyonaryo, mihatag og similar nga kahulogan nga ang mardi gras, usa ka kalingawan, usa ka karnabal, gisaulog didto sa Paris, New Orleans, ug ubang mga siyudad, gisaulog sa usa ka adlaw sa dili pa ang kwaresma. Sa ato pa, katapusang adlaw sa pagkiat-kiat una mag-Ash Wednesday, unang adlaw sa Lent.

Mao ba ni ang Sinulog nga ila man ning ginganlan og mardi gras? Ang mardi gras, wa gyuy relasyon, walay koneksiyon sa Sinulog. Ambut nganong ganahan silang mogamit ining pulong mardi gras. Tingali tungod kay nindot paminawon.

Sa among panahon, panahon ni kanhi Customs Collector Boy Odilao, niadtong panahona, siya ang regional head sa MYSD, iyang gi-introduce ngadto sa ARENA 7, ang Sinulog. Iyang intention mao ang pagdala sa sinulog nga gisayaw sa mga tindera sa kandela, pagawas sa Basilica, ngadto sa kadalanan – apan halad gihapon ngadto sa Sto. Niño .

Mao usab kini ang intensiyon ni Mayor Dodong Solon, sa iyang pagsagop sa Sinulog nga mahimong kasaulogan sa dakbayan sa Sugbo. Dili kiat-kiat, dili paghubog-hubog, dili pagpintal ug paghugawhugaw sa nawong, dili Ati-Atihan, dili Dinagyang, gani gihunong man ang participation sa mga sexing bayot sakay sa float – kon dili, ang Sinulog, primarily ug basically, usa ka kasaulogan, usa ka street dancing, halad ug sangpit ngadto sa Batang Hesus.

Mao nga natingala kita nga mo-insist gyud sila ang Sinuoog usa ka mardi gras. Sugot ka ini, Dro? Lagmit kay karaan man ang akong mga diksiyonaryo, duna tingali bag-ong kahulogan ang mardi gras.

Ug nia pa, kining pag-ingon nga 9-day novena, redundant na ni kay walay novena nga duha o pito ka adlaw, siyam gyod!