Ang pagbasura sa impeachment complaint wa mo-clear ni Gloria

Mao ni ang yano nga pangagpas ni Pedro. Matud niya, wa kono kini maka-abswelto ni Gloria beyond reasonable doubt, kondili, igo lamang kining nagpakita sa kadaghang alalay sa Presidente sa Ubos Balay-balaoranan, period. 

Ang pangutana kun sad-an ba ang presidente, nagpabilin kining pangutana sa utok sa katawhan. Maoy hinungdan nga naghuwat na lang ang lungsod sa 2010 aron sila na lang ang mohukom ug mohusay sa mga isyu nga hangtud karon, gikan sa Hello Garci hangtud sa kang Bolante ug de la Paz, nakapalibog gayud sa katawhan.

Apan, mora mag di sad sila gustong mag-eleksiyon. Mora mag hadlok sila sa eleksiyon. Hadlok ba sila nga magkapuliki unya pagpanubag sa mga isyu nga buot husayon sa katawhan?

Sa Amerika, taliwa sa dakung krisis nga ila karong giatubang, wa gyuy bisag usa ka Amerikanhon, ma-Senador, ma-Gobernador, ma-Secretary sa local government, ma-police, ma-garbage collector, o ma-yanong lungsuranon, ang misuway pagsugyot nga dili mag-eleksyon gumikan sa krisis. Labi pang walay misugyot nga mag-Cha-cha na lang aron makapadayon si Bush sa gahum.

Pastilan, dinhi sa ato, ambut nangaunsa na ta ini, Dro! Mora mag ipamugos gyud nila ang cha-cha, lagmit i-extend ang ilang mga term, ug di na lang una ta mag-eleksiyon. Ambut kun nananghid ba ni sila nimo. Sila na lay nagbuotbuot, kaylagi, gumikan sa ilang kadaghan, walay makapugong nila.

Ang mga pundok nga mipalanog sa ilang pagsupak, ila lang gi-belittle, gikataw-an. Pastilan, pagkahawod gyud nila. Si JDV nga igo lang misubay sa iyang konsiyensiya, tapus mo-acknowledge sa mga kasaypanan nga iyang nahimo in the past, ilang gitabangan og daut.

Inay mangutana kun nagsulti ba sa tinuod si JDV, ila na hinoon gisumbalik ang mga charges ngadto kaniya. Unsaon nato pagpagimaw sa kamatuoran niini kun mag-iyahay lang tag labay og lapok. Ang mahitabo, magkalapok tang tanan. Ug lagmit, mao na kini karon ang hulagway sa atong nasud – naduhig na ta sa lapok.

Unsaon nato pag-move forward niini? Ang impeachment nga maghatag untag higayon sa Presidente pag-clear herself, gibasura hinoon sa iyang mga gisakopan. Ug karon, maoy ilang gusto nga mag-cha-cha lang ta sa tumang kalipay. Naglibog ka Dro?