Barko nga utangan

Pito ka mga opisyal sa Bureau of Customs – Port of Cebu gipang-suspenso sa katungdanan tungod sa pagkahanaw sa kontrobersiyal sa floating casino nga MV Philippine Dream.

Sila si Capt. Alfonso Abarriao, Capt. Benjamin Capacite, Marcelo Gaviola, Luis Patriana, Jessica Delgado, Vanessa de Madrazo ug Ismael Abdulcadir gisuspenso sa katungdanan samtang nagpadayon ang imbestigasyon pag-andam sa kasong administratiba batok kanila.

Sila ang gipasanginlan nga hinungdan nga nakabuhi gikan sa mga kamot sa Bureau of Customs ang MV Philippine Dream bisan aduna kini hold order ug warrant of seizure and detention.

Ang maong barko napalit sa Philippine Dream Co. niadtong 1994 nga tax-free human kini maka-benepisyo sa incentive program sa gobyerno, pinaagi sa Board of Investment (BOI). Apan sa pipila ka tuig nga operasyon niini, nakasinati kini og pagka-alkanse hinungdan nga gihunong ang operasyon niini niadtong 2004.

Tungod niini, ang BOI mibawi sa incentive ug gidemanda sa Bureau of Internal Revenue nga pabayran ang P49.77 milyones nga capital equipment tax.

Puwerteng luoya sa tag-iya nga kompaniya tungod kay naglisud na kini pagbawi sa alkanse hinungdan nga napugos kini sa pagbaligya sa barko human mabayri ang buhis sa BIR. Gibaligya kini ngadto sa laing korporasyon nga mao ang Ablan Brothers Corp.

Gawas sa maong buhis, ang Bureau of Customs Port of Cebu mi-assess og duties sa barko nga P12 milyones. Sa kapakyas sa tag-iya pagbayad, giisyuhan kini og hold order ug warrant of seizure and detention (WSD).

Si District Collector Ricardo Belmonte mibabag sa pag-release sa barko tungod kay tuyo niya nga i-release lamang kini kun mabayran ang duties ngadto sa customs.

Apan ang mga kugtong sa adwana, bisan sa hold order ug WSD ug sa “objection” ni Belmonte, gi-release ang barko hinungdan nga nakadagan kini ug karon tua na magpa-utaw-utaw sa Bangladesh.

Apan maayong masayod ang publiko nga dili lamang ang customs ang angayan pakasad-on sa pagkahanaw sa MV Philippine Dream.

Tungod kay ang nagdalidali og release sa barko mao ang BIR.

Punto sa BIR nga human mabayri ang capital equipment tax sa tag-iya, sibo lang nga i-release nila ang barko.

Apan wala gyud hunahunaa sa BIR nga aduna pay duties and taxes sa customs nga P12 milyones nga wala mabayri sa tag-iya o sa buyer niini, nagpursige gyud kini nga ma-release ang floating casino.

Ibutang nato nga dili na trabaho sa BIR ang pagseguro nga mabayran ang P12 milyones nga utang sa buhis sa customs, apan maayong masayod sila nga ang P12 milyones alang gihapon sa gobyerno, busa tipik sa ilang trabaho ang pagseguro nga makolekta kini alang sa kaban sa gobyerno.

Ang BIR mi-release usab sa maong barko bisan adunay sulat si Collector Belmonte pagpahibalo sa P12 milyones nga utang sa tag-iya niini ngadto sa customs.

* * *

ROLLBACK. Dili maka-esplikar ang tulo ka higanteng kompaniya sa lana unsay hinungdan nganong nagpadayon sila pagpamagahi sa pagsunod sa gagmay’ng kompaniya sa lana nga nagpatuman og sunodsunod nga rollback.

Mitibugsok pag-ayo ang presyo sa krudo sa kalibutanong merkado, busa ang mga gagmay’ng mga negosyante og petrolyo sama sa Unioil, PTT, ug uban pa wala magmakuli pagpatuman og rollback.

Nalipay ang sektor sa transportasyon sa gihimo niining mga gagmay’ng kompaniya sa lana, apan wala silay nahimo gawas sa pagkondenar sa gibuhat sa Chevron Caltex, Shell ug Petron nga gahi pa sa bahug-bahog pagpatuman og rollback.

Usa pa sa makahibulong ang pabiling pagkalansang sa taas kaayo nga presyo sa matag kilo sa liquefied petroleum gas (LPG) bisan sa pagtibugsok sa presyo sa krudo.

Mao kini ang akong giingon sa miagi natong lindog nga malisud but-an kining mga kompaniya sa lana tungod kay ang oil industry “deregulated” na, nga sa ato pa, dili makapanghilabot ang gobyerno.

Dili na lang ko maglangan og ingon nga kinahanglan na gyud nga rebyuhon ang Oil Deregulation Law, aron malili sa kagamhanang nasyonal ang negatibong epekto niini.

Ug kun masota nga wala kini gidulot nga kaayuhan, maayo kining wagtangon sa mga listahan sa atong mga balaod.