Dugang palas-anon sa mga pordoy

Giaprobahan na sa Land Transportation Franchising Regulatory Board ang bag-ong umento sa pamasahe sa mga pampublikong sakyanan. Ang umento naglangkob sa 50 sentabos nga dugang sa balayranan sa mga public utility jeepney sulod sa lima ka kilometro.

Kining bag-ong pagsaka sa pletihan natigayon gumikan sa mga yangongo sa sektor sa transportasyon gumikan sa walay hunong nga pagtaas sa presyo sa gasolina dala usab sa pagsaka sa presyo sa lana sa world market.

Dugay nang giyangongo sa mga drayber sa mga pampasaherong bus ug jeepney ang sunodsunod nga pagsaka sa presyo sa gasolina. Matud nila, dako kaayo ang pagkunhod sa ilang inadlaw nga kita ug halos wala na silay ipakaon sa ilang mga pamilya tungod sa sunodsunod nga pagsaka sa presyo sa gasolina.

Hinuon ang bag-ong pagsaka sa pletihan usa ka grasya ngadto sa mga anaa sa sektor sa transportasyon. Apan usa na usab kini ka palas-anon kanatong mga yanong lungsoranon taliwala niining krisis sa ekonomiya nga mihapak sa Pilipinas niining panahona.  

Bitaw, taliwala niining mga pagtaas sa presyo sa nag-unang mga palaliton, ang pagsaka sa pletihan dugang na usab nga krus nga pas-anon ni Juan dela Cruz kinsa daan nang nag-ilaid sa tumang kalisod.  

Ang angay unta nga gibuhat sa kagamhanan mao ang paghatag og mga benepisyo ngadto sa sektor sa transportasyon ug dili ang pagtugot sa umento sa pamasahe. Kining mga benepisyo maglangkob sa rice subsidy ngadto sa mga drayber sa pampublikong sakyanan.   

Dili lamang ang sektor sa transportasyon ang grabe’ng naapektohan sa pagtaas sa presyo sa lana. Kitang tanan ang naapektohan niini tungod sa pagtaas sa mga nag-unang palaliton.

Apan ang maong sektor mao na hinuon ang gihatagan og pabor sa kagamhanan pinaagi sa pag-umento na usab sa pletihan. Kini nga kalamboan nagdugang hinuon sa palas-anon natong mga pordoy.

Kung dugang benepisyo pa lamang unta ang gihatag sa kagamhanan ngadto sa sektor sa transportasyon, dili na unta kitang mga yanong lungsoranon mag-antos pa niining dugang pagsaka sa pletihan.

Apan sa akong tan-aw, kining bag-ong pagsaka sa pamasahe walay maayong ikadalit ngadto sa mga drayber sa mga jeepney. Kini gumikan kay sigurado ako nga motaas na usab ang “boundary” nga isingil sa mga jeepney operator sa rason nga moumento na usab ang kita sa ilang pagpamasada.

Sa laktod nga pagkasulti, ang dugang kita sa mga drayber sa jeepney gikan sa dugang umento sa pletihan dili moabot sa ilang mga pamilya kundili ngadto na hinuon sa mga tag-iya sa mga jeep nga ilang gi-drayban. Ug kun atong kuwentahon, alkanse gihapon kining mga drayber bisan pa man sa pagtaas sa ilang kita nunot sa pagsaka sa pletihan.

Kinsa man gud ang wala maglisod niining panahona? Kun gihatagan og pabor sa kagamhanan ang sektor sa transportasyon nunot sa sige’ng pagsaka sa presyo sa gasolina, nganong dili man usab kini makahimo’g lamang pagsalbar sa tanan gikan sa hilabihang kalisod?

Hinuon atong nasabtan nga wala gayuy gahom ang atong kagamhanan pagkontrolar sa presyo sa lana sa world market. Apan daghan kini’g lakang nga mahimo aron maibanan ang epekto niini kanatong mga anaa sa labing ubos nga sektor sa katilingban.   

Kini sama sa pagpakunhod sa buhis nga regular atong gihatag sa gobiyerno aron usab nga modako ang gahin alang sa atong mga pamilya. Bitaw, dili lamang ang sektor sa transportasyon ang naglisod niining mga panahona kundili ang tanan, ilabina kanatong mga pordoy.

Ug angay lamang nga patas ang pagtratar sa kagamhanan aron dili usab makaingon ang uban nga aduna kini pinalabi.

* * *

Ipadala inyong reaksiyon sa [email protected]