Ang gikalimtang Tumugpa

Sa pag-adto ni Vic Serna sa Balitang Bisdak sa Barangay Tumugpa sa lungsod sa Tuburan sa lalawigan sa Sugbu aron mokuha og balita sa giingong sakop sa NPA nga gilubong sa maong lugar, wa niya damha nga aduna pa diay laing balita nga nagpaabot kaniya, ug kini mao ang Barangay Tumugpa mismo. Ang Barangay Tumugpa usa ka bukirang bahin ug mga triyenta kilometros ang gilay-on niini gikan sa lungsod sa Tuburan. Ngi-ob ang maong dapit tungod kay wa pa kini maabot sa sugang dagitabnon.

Aduna kini gamay nga lawak saringanan ug dinhi niining maong gamay nga lawak magklase ang Grade One, Grade Two, Grade Three ug Grade Four nga mga tinun-an nga puli-pulihon usab sa pagtudlo sa nag inusara nilang magtutudlo.

* * *

Abot sa dunggan ang ngisi ni Gobernador Gwendolyn Garcia ug Kapitan Mary Ann delos Santos kaniadtong miaging semana dihang ilang gibuksan ang bag-ong school building sa Lahug Elementary School diin kabahin sa gipatukod niini mao ang lima ka milyon ka pesos nga gidonar sa gobernadora. Dako usab kaayo ang kalipay sa mga tinun-an ug mga ginikanan sa nahisgutang tunghaan tungod kay maloag-loag naman ang ilang lawak saringanan. Apan luyo sa ilang kalipay ug kamaya aduna diay dughan sa mga bata sa barangay Tumugpa nga nagmagul-anon nga nagpangamay, padayon nga nangindahay nga unta sila duolon sa maloloy-on nga kasing-kasing sa gobernadora nga andam ug tagana nga mosapupo ug mosapnay sa mga bata nga nagpakilooy.

* * *

Wa ko magtuo nga sa pagka-progresibo sa lalawigan sa Sugbu aduna pa diay mga dapit niini nga wa pa makakita maski anino lamang o makahikap niining ilang gitawag nga kalamboan. Kaingon ko ba og nakita na sa gobernadora ang dagway sa tibuok lalawigan sa Sugbu kay nagsige man kini siya og suroy-suroy apan wa man diay, kay wa man niya makit-i ang subo nga kahimtang sa mga batang tinun-an sa Barangay Tumugpa sa lungsod sa Tuburan. Hinaut nga makita usab unta sa atong gobernadora ang mga taga Tumugpa.