Ang biso-biso ug ngisi sa managkontra sa politika

Dako kaayo og katawa samtang nagpalakpak sa iyang mga kamot si Bise Mayor Mike Rama nga nagtan-aw nila ni Mayor Tomas Osmeña ug Gobernadora Gwendolyn Garcia nga naglamanohay ug nagbiso-biso ibabaw sa intablado atubangan sa bagang duot sa katawhan nga misaksi sa awarding ceremony sa Sinulog 2008 sulod sa Cebu City Sports Complex kaniadtong adlaw’ng Lunes. Kita upod nako ang kamaya sa dagway sa Bise Mayor nga nagtan-aw usab ni Mayor Tomas Osmeña nga nagngisi nga mipatong sa iyang kamot sa abaga sa nagngisi usab nga si Lahug Barangay Kapitan Mary Ann Delos Santos. Daw gigitik ang Bise Mayor sa iyang nakita sa managkontra sa politika nga nagkahiusa ibabaw sa entablado. Ambot? Unsa kaha ang naa sa huna-huna sa Bise Mayor samtang nagtan-aw sa tulo ka mga managkontra sa politika nga nagbiso-biso, naglamanohay ug nagngisihay? Unsa upod kaha ang naa sa huna-huna nila ni Mayor Tomas Osmeña, Gobernadora Gwendolyn Garcia ug Kapitan Mary Ann Delos Santos sa dihang nagbiso-biso, naglamanohay ug nagngisihay sila? Ang ngisi ni Mayor Tomas Osmeña ug Kapitan Mary Ann Delos Santos dili kaha kadto ngisi nga kapaakon? Wala kaha magpinig-anay sa ilang mga kamot si Tomas ug Gwen sa dihang naglamanohay kini samtang nagbiso-biso? Ang atong nakita sa tulo ibabaw sa entablado bunga na kaha kini sa gahom sa Espiritu Santo o lamdag ni Senyor Santo Niño? O ang atong nakita mao lamang ang pagka civil sa tulo. Ambot! Sila lang ang nasayod kun ang ilang gihimo tininuod ba kini o pagpakaaron-ingnon lamang. Manghinaot lang ko nga ang biso-biso, paglamanohay ug ngisihay sa tulo ka opisyal sinugdanan na kini sa panag-uliay sa maayong kabubot-on nga nagkabingkil tungod sa ilang pangangkon nga amahan ug inahan sila sa katawhan nga ilang gialagaran ug nga gusto lamang nila kining panalipdan.

* * *

Giwara-wara ni Presidente Gloria Macapagal-Arroyo ang resulta sa survey nga gihimo sa Social Weather Station kun SWS nga nagpakita nga miubos na ang gidaghanon sa mga tawo nga miingon nga sila kabus. Ang buwan sa Disyembre 2007 nga SWS survey nagkanayon nga 46 porsiyento na lang ang mga tawo nga miangkon nga sila kabus, ubos kini kun itandi sa resulta sa survey nga gihimo sa SWS kaniadtong bulan sa Septiyembre 2007 nga adunay 52 porsiyento nga miangkon nga sila kabus. Tungod niini si Presidente Arroyo miangkon nga ang pag-ubos sa gidaghanon sa mga kabus bunga na kini sa paningkamot sa iyang administrasyon. Porbida! Pagkadili masabot! Kining Malakanyang makalibog. Negatibo gani ang resulta sa survey, ang Malakanyang dili motuo sa resulta niini pero kun positibo dayong panghambog sa resulta sa survey. Ano ba talaga ate? Magpakatotoo naman kayo!