EDITORYAL – Ang nag-una’g sinulog sa kadalanan

Usa ka balikbayan ang nangutana kun hain na kaha karon kadtong mga bata (kinsa mga hamtong na karon) nga nagsinu’g samtang nagsunod sa karo ni Sr. Sto. Niño atol sa prosisyon sa Pista Senyor.

Kadtong mga bataa, kinsa magsul-ob og costume sa toy soldier, nagwarawara sa kahoy nga espada samtang sila nagsinu’g uban sa tambol sa usa ka babaye nga kabahin sa ilang pundok, mao kadtoy labing una nga mananayaw sa sinulog sa atong kadalanan.

Ug kadtong babaye (kinsa hamtong na adtong higayona) maoy labing unang manambolay kang kansang tuno ug tempo sa tambol maoy gisunod karon sa atong moderno nang sinulog.

Hain na kaha to sila? Ang gihisgutang balikbayan misugyot nga pangitaon kadto sila, pundokon sa usa ka reunion, ug himuon kini nga usa ka parte sa selebrasyon sa Pista Señor.