Hangtod asa kutob ang katihik?

“Usa ka tawo ang mihatag kanako og komentaryo nga kuno ako tihik ra kaayo kay sa ilang hubog ug kapritso dili kaayo ako modugo. Daghan daw kuno ang kolekta sa matag higayon nga ako magmisa, mao nga kinahanglang ipamahin kuno aron sila pud malipay kay masuko kuno ang Ginoo sa mga tawo nga hakog ug laog?!” Ang wala lang masayri ning mga bordigoy nga sagoy nga ang kolekta baya balaan kaysa mga tawo gihagoan og dili angayang gamiton sa mga binuang apil na ang mga kalipay’ng mabaw ug walay hinungdan.

Kinsay dili buot mahimong kwartahan ug mahimong hayahay. Kitang tanan buot gyud unta apan hangtud og asa man kutob ang atong pagsabot niini? Daghan ang magtigom aron mas motubo pa ang tinigom sa bangko. Daghan ang nagpunay og palit sa mga kayutaan aron katamnan. Labaw nang mas daghan ang nanghantok sa mga langyaw sa pamasin nga mamahimong haruhay bahala nag bun-ogon sa mga langyaw’ng way batasan (hinuon dili tanan). Daghan kanato ang nagtigom, nagtigom ug mohakgom apan dili maantigong mobukhad. Pagkapait kay inigkamatay diay mga kabtangang wala matarong og bahin maoy hinungdan sa mga dugoong pinatyanay ug way pulos nga linibakay.

Ang Ginoo nagdapit kanato sa paggamit sa paagi nga husto sa atong mga katigayonan nga gipiyal kanato. Kini nagpasabot og paggamit niining kalibutanong mga kahimanan ug katigayonan ginamit ang usa ka espirituhanong panlantaw. Nga dili nato hunahunaon kun unsay gastoan hinunoa mangutana kita kun ngano ug angayan ba gyud nga gastohan.

Agig panapus ning maong pamalandong ato kunong hinuklogan ang giingon ni Henri Nouwen: “How can I live my life so that my death will be fruitful for others?” Mao timbanga kuno ang imong katihik nagpaduol ba kanimo sa Ginoo o nagpalayo ba hinuon kaniya nga maoy tag-iya sa imong kinabuhi.