Kawat sa kontribusyon SSS

Kun wa ko masayop, minilyon ka pesos ang gigasto sa Social Security System gikan sa kwarta natong mga membro alang sa computerization program niini.

Tungod sa computerization di na kinahanglang mag-antos og linya ang mga membro didto sa buhatan sa SSS aron masusi ang membership status. Pinaagi sa internet mamahimo na natong masayran ang mga importanting impormasyon bahin sa atong membership.

Pinaagi sa computerization nagpaabot unta ang mga membro og mas maayo ug efficient nga serbisyo gikan sa maong buhatan. Apan ang nahitabo nako ug sa uban nga pareha nako og estado sa pagpangempleyo seryoso ug angayang ikabalaka kay dungan sa ka high-tech na sa maong buhatan nabalaka ko nga ingon na sab niini ka high-tech ang pagpangurakot sa kwarta sa ilang mga membro.

Aron inyong masabtan, duha ang akong employer ang The Freeman ug and DYLA. Sa duha ka mga kompaniya diin ako mag-alagad gikolektahan ko og  premium sa SSS matag buwan.

Sulod sa pipila na katuig kanunay kong nagbayad sa akong premium pinaagi sa duha ka mga kompaniya. Niadtong may duha na ka buwan ang nakalabay, ang akong mga higala misugyot nako nga suwayan og loan aron pag-update kuno sa akong records.

Akong gisuwayan, nidangat nalang ang duha ka buwan wa gyud ko masayod og unsay nahitabo sa akong loan application. Hangtud nga niadtong miaging semana, nakadawat ko og notisya gikan sa SSS nagpahibawo nako nga gi-deny ang akong loan application.

Wa ko masakit nga gi-deny ang akong application, apan ang dili nako madawat nga rason sa ilang pagbasura sa akong application mao nga di kuno ko empleyado sa kompaniya nga mi-certify sa akong application.

Sa dihang mi apply ko, didto nako ni gi-file sa DYLA, busa ang DYLA pinaagi sa among general manager nga si Marit Remonde maoy mi certify niini.

Unsa may nahitabo sa computerization sa SSS, kun ang simpling record sa membro nga sama nako wa magkadimao? Tiaw bay ingnon nga dili ko empleyado sa DYLA unya sud sa kapin na siguro sa napulo ka tuig mikangkang ang ilang mga kamot pagdawat sa akong contribution.

Ang record sa among kompaniya nagpakita sab nga updated mi sa among pagbayad. Kun mao hain man diay mopaingon ang contribution nga ilang gikuha nako pinaagi sa DYLA?

Sulod sa kapin na sa 10 ka tuig ko nga ilang gikolektahan og premium sa DYLA, sa ato pa ang akong contribution sud sa maong gidugayon nahanaw diha sa SSS?

Ambot og hain ibutang ang utok sa mga opisyal sa SSS? Tiaw mo bay bisan og ni-certify ang employer nga ila kong empleyado unya himuon nilang rason mao nga dili ko empleyado sa kompaniya nga ni-certify. Di ba common sense man na nga kun mo certify ang kompaniya pasabot ila kang empleyado.

Pero dili na maoy nakapabalaka nako, ang makapabalaka mao kun hain na mopaingon ang akong contribution. Pila man kaha ka mga membro nila ang sama nako og sitwasyon?

* * *

E-mail:  [email protected]