‘Wowowee’ wins seat in Ecija’s Sanguniang Panlalawigan

Humana ang bugnong lugaynon apan padayon pang naghinamhinam ang katawhan sa kuwatro distrito nga nagpaabot sa resulta sa mananaog sa pagka kongresista tali nila ni kanhi bokal Benhur Salimbangon ug Tining Martinez nga Mayor sa lungsod sa Bogo. Nalangay ang paggawas sa resulta sa pagka kongresista sa kuwatro distrito tungod sa kadaghang mga reklamo nga gisang-at sa matag kampo nga mimugna og suspense ug drama. Ang mga election returns nga gikan sa lungsod sa Bogo nga giingong gimaniobra ug minamao-mao namura na sa langaw nga puwa og lubot, nahadiin-diin na lamang tugpa. Gikan sa Bogo mipaingon sa Kapitolyo, mipaingon sa opisina sa rehiyonal nga buhatan sa Commission on Election ug karon atua na pod mitugpa sa Kaulohan. Gikan sa pagkahanaw sa mga sakop sa Municipal Board of Canvassers sa Bogo ngadto na sa pag citizens arrest sa mga sakop sa Special Board of Canvassers, pagdala ngadto sa tambalanan sa bag-ong napili nga chairman niini gumikan kay nakuyapan ug ang panagbangi sa mga sakop sa media ug sa director sa commission on election dinhi sa rehiyon siete nga si Atty. Ray Rene Buac ug ang people power sa mga dumadapig ni Benhur ug Tining. Drama! Suspense! Mao kini ang nahitabo sa piniliay sa pagka kongresista sa kuwatro distrito. Kining tanan namugna gumikan sa giingong TIKAS.

* * *

Gibabagan ug gi-question sa kampo ni Tining Martinez ang pagdala sa 15 ka mga gidudahang minamao-mao nga mga election returns didto sa uluhang buhatan sa Commission on Election, gani ila pang ipaabot ngadto sa labaw'ng hukmanan ang ilang reklamo batok sa Comelec kon ugaling dili sila hatagan og pabor sa ilang kagustuhan. Pangutana lang! Nganong babagan man sa kampo ni Martinez ang pagdala sa election returns didto sa kauluhan kon ugaling tinood gyod kini ug dili minamao-mao? Way angayang kahadlokan si Tining bisag adto pa dad-a sa atubangan ni San Pedro o ni Satanas ang mga election returns kon ugaling tinuod gyod kini ug dili minamao-mao.

* * *

Nganong matag human sa piniliay aduna may moreklamo og tikas. Tungod ba kay ang mga pildiro di makadawat sa ilang kapildihan o tungod ba kay tinuod gayod sila nga gitikasan? Sa pagka tinood wa pay piniliay dinhi sa atong nasud nga way nanikas. Ang tikas sa piniliay nahimo tungod kay aduna gayoy mga tawo nga mamugos sa ilang kaugalingon sa paglingkod sa lingkuranan sa kagamhanan dili tungod kay moalagad sa katawhan kon dili tungod kay gusto kining mopahimulos sa gahum kon ugaling maiya na kini. Ang nakapait, ina kay mawagtang midaghan hinuon sila tungod sa pag uyon sa pipila ka mga opisyal ug mga tawo nga maoy nagdumala sa atong piniliay. Kon wa pa untay mga membro sa Board of Election Inspectors, Board of Canvassers ug Commission on Election nga mabayran, wa untay reklamo sa tikas nga atong madungog matag human sa piniliay. Busa kon damgo man nato ang tinuoray nga resulta sa piniliay,butangan nato ang board nga atong nahisgutan og mga tawong dili nawong og kuwarta ug dili madala og hulga.