Nagdali sa reward?

Usa ka semana human sa linuog nga pagpatay ni konsehal ug kanhi mayor Rogelio Illustrisimo Sr. kinsa nagpapili sab pagkamayor sa Santa Fe, duna nay gitumbok ang kapolisan nga responsabli ug gipasakaan og kaso didto sa piskaliya. Dungan sa pagtumod kang Mayor Dokdok sa lubnganan, gisang-at sab sa Homicide Section ang kasong murder batok sa iyang kontra sa politika nga si Domingo Zaspa, kinsa gitudlong mastermind ug sa kanhi polis nga si Arnulfo Pigon nga maoy gitudlong gunman.

Si Pigon gitudlo sa usa ka taxi driver nga maoy mipusil ni Illustrisimo samtang si Zaspa gikatahong nakit-an sa duha ka polis didto sa Marriott Hotel nga nagtagbo ug si Pigon. Si Garner Cole, driver sa Tiger Taxi, nangangkong eyewitness sa krimin. Matud niya nga naghatud siyag pasahero sa Capitol compound niadtong buntag sa Mayo 2 sa dihang iyang nadungog ang buto sa armas.

Matud ni Cole nga iyang nakit-an ang suspetsado nga nagti-on pa''s iyang armas ngadto ni Illustrisimo nga nahagba na niadtong higayona sa yuta. Ang suspetsado nga nailhan ni Cole pinaagi sa hulagway nga gipakita kuno sa kapolisan ngadto niya mao si Pigon.

Sumala pa niya nga iyang naklaro ang panagway niini tungod kay didto kini moagi sa iyang nahimutangan sa dihang mieskapo human sa pagpusil ni Illustrisimo.

Ang pamahayag ni Cole gisuportahan sab sa duha ka mga habal-habal driver diha sa Villalon Drive nga maoy mihatag sa description sa mamumuno hinungdan nga nakahimo og cartographic sketch ang kapolisan nga mitukma sa panagway sa suspetsado.

Apan di klaro og unsay basihanan sa kapolisan pagtumbok ni Zaspa nga maoy utok sa krimin, gawas lang sa iyang kapakyas pagtunga sa dihang gipatawag sa kapolisan alang sa imbistigasyon. Si Mayor Roger Illustrisimo miingon nga kumbinsido siya nga si Zaspa nalambigit tungod kay nakit-an siya didto sa dapit diin mahitabo ang krimin ug nga duna kuno kini''y bahad nga di na magdugay ang iyang amahan.

Si Mayor Roger miingon nga wa say laing kontra ang iyang amahan nga posibling magtinguha sa iyang kinabuhi. Gawas niini duha ka mga polis nga sila si PO1 Albert Luardo ug Roy Veloso miingon nga ilang nakit-an si Zaspa ug si Pigon nga matud pa nagkita didto sa Marriott Hotel.

Kadudahan hinuon ang pangangkon sa duha ka polis tungod kay, kun tinuod nga ilang nakit-an didto sa Marriott nganong wa man nila kini dakpa? Nganong sila man maoy nibarug nga saksi, inay nga mangita og saksi didto sa hotel? Nganong wa may video sa surveillance camera sama sa Kapitolyo nga ilang nakuha nga magpakita sa panagtagbo nilang Zaspa ug Pigon?

Ingon nila nga wa kuno magtrabaho ang security camera sa hotel, kun tinuod, nganong di man mga gwardiya maoy ilang gihimong saksi? Nganong wa man say kamatuoran gikan sa hotel pagmatuod nga didto mi-check-in si Zaspa sa maong hotel?

Tungod sa kakuwang sa maong mga testigo ug mga ebidensiya, kadudahan ang motibo sa kapolisan paglambigit ni Zaspa. Wa kong mag-ingon nga way labot si Zaspa sa krimin, di sab ta makaingon nga apil gyud siya, ang akong punto mao nga di kaha excited ra kaayo ang kapolisan pagpasaka sa kaso nga wa pay lig-ong ebidensiya?

Di kalikayang magduda nga gidali-dali sa kapolisan ang pagpasaka sa kaso lakip sa mastermind tungod sa pressure tungod kay si Presidente Arroyo mismo gustong madali ang kasulbaran niini. Laing posibling rason mao ang kadako sa reward nga gitanyag alang sa kasulbaran sa maong krimin.

Pasensiya sa atong kapolisan, apan wa kahay gustong magdali og kubra sa P1.3 milyones nga reward niini, maong bisan og way direktang ebidensiya batok sa mastermind gidali pagpasaka?

Si Mayor Roger midemanda og explanation nganong way gwardiya ug CSU didto sa dapit atol sa pagpusil sa iyang amahan. Bisan tuod og matud niya kumbinsido siyang si Zaspa gyuy mastermind, pero duna pay nagpahipi nga pagduda sa iyang huna-huna hangtud nga maesplikar og tarong kay way gwardiya sa duol sa Comelec niadtong higayona.