Most corrupt country in Asia: Di ka mauwaw ana, Dro?

Alang sa atong mga lider, morag wa lang nila ang naangkon natong notoriety isip nga the most corrupt country in Asia … (I hope not in the world). Naka-afford pag deny. Ang atong mga kaigsoonang Pinoy nga atua gawas sa nasud, kaylagi, di sila mabuhi dinhi, nagpunay panagang niining maong "kadungganan."

Sa atong mabasa sa mga mantalaan, ang uban kanila mo-text nga husto na ang pangurakot, sila didto ang mauwawan. Mabawo silag panagang.

Anyway, manghinaut kita nga paningkamotan gyud ni sa atong kagamhanan nga masanta kining maong kahugawan sa panggobiyerno. Hinumduman nga hilabihan natong sukoa ni Marcos gumikan sa corruption. Gipatiran nato si Marcos uban sa pagtuo nga molayas uban kaniya ang corruption.

Nag-people power ta. Gidayeg kita sa tibuok kalibutan, gumikan sa atong pagpalagpot sa diktador sa malinawon nga paagi.

Apan, karon, unsay nahitabo? Atong gi-ban ang people power, ug gibilin ang corruption. Sa ato pa, di na ta ka-people power aron unta mapitol ang corruption.

Eleksiyon. Buot nila nga dili ilakip sa mga isyo ang corruption, kay wa kono ni labut sa eleksiyon. Concentrate kuno ta sa ekonomiya nga maayo na ang lakaw.

Maayo? Okay, nibarato ang gasolina, milig-on ang peso batok dolyar, ug mibaha ang dollar remittances gikan sa gawas.

Apan misaka ang buhis. Nagpadayon ang pagmahal sa mga palitonon, mahal ang semento, ang lansang, ang bugas, ang ginamos, ang toothpick, ang kamates, ang saging ug ang bayranan sa Citom sa atong pag-parking sa kaugalingon natong kadalanan.

Unya, tanang mga bayranan sa gobiyerno misaka, sama sa atong pagpa-renew sa registration sa atong mga sakyanan, mga lisensiya, business permit, customs duties, ug uban pa.

Alang kanato nga may ordinaryong mga utok, maglisod pagsabot niini, nga samtang minindot kuno ang ekonomiya, nagpadayon ang atong kalisud, nagsigeg saka ang mga presyo sa tanang palitonon, ug naglumba gihapon ang atong mga kaigsoonan paglayas ngadto sa ubang kanasuran, kay di sila mabuhi dinhi.

Unya, balig pila man ang salapi nga mausik gumikan sa corruption? Nga kon wa pay corruption, ma-felt unta sa mga yanong lungsuranon ang ilang giingon nga paglambo sa atong ekonomiya. Di ba, Dro?