EDITORYAL - Suportahan ang awhag sa CBCP

Panahon na nga maghiusa ang katawhan aron makab-ot ang tinguha nga ang umaabot nga eleksyon sa Mayo ning tuiga mamahimong usa ka limpyo ug katuohan nga piniliay.

Kini maoy awhag sa mga Katolikong obispo diha sa ilang pastoral letter nga ilang gi-address ngadto sa tanang parokya sa Simbahang Katoliko sa tibuok nasud.

Ang Catholic Bishops Conference of the Philippines (CBCP) nanghinaut nga dili na unta mausab ang nahitabo sa piniliay niadtong 2004 diin ang resultado nahimong kontrobersiyal tungod kay namansahan kini sa mga pasangil nga dunay halapad nga pagpanikas.

Ang maong mga alegasyon nakapagubot sa Pilipinas ug naka-apektar sa kalambuan sa ekonomiya ug social justice sa nasud, suma pa sa CBCP.

Kami misuporta sa awhag sa CBCP ug manghinaut usab kami nga paminawon ug hatagag gibug-aton dili lang sa mga parokya kun dili usab sa katawhan kang kansang kaayohan maoy tumong sa mga obispo.