Ibog ni Cruz

Naglaway pag-ayong oposisyon sa ni-resign nga si Defense Secretary Avelino Cruz, nga si kanhi presidente Joseph Estrada wa mag-usik og panahon nitanyag dayon niya nga padaganon pagka senador ubos sa landong sa alyansa batok sa administrasyon ni Pres. Arroyo sa eleksiyon sunod tuig, di lang tungod sa iyang katakos ug kinaadman kon dili tungod sa ilang panghinaot nga hingpit nang iyang pagtalikod sa presidente ug nga wa siya mag-inusara sa iyang kahimangod sa Malakanyang.

Si Cruz way politikanhong base. Di siya popular. Kadudahan pa gani pila ra ka porsiyento sa mga botante ang nakaila niya. Apan nagharab-harab ang oposisyon pagsipong ni Cruz human sa iyang pagbiya sa gabinete tungod sa gamhanang kahugpongan nga iyang girepresentahan.

* * *

Si Cruz sakop sa Villaraza Law Office nga gitawag nga "The Firm" kay silay nagrepresentar sa presidente, sa iyang bana, si First Gentleman Mike Arroyo ug sa ubang mga sakop sa unang pamilya. Way laing pundok sa mga abogado nga makaharong sa "The Firm" di lang tungod sa kadagko ug kagamhanan sa ilang mga kliyente kon dili tungod kay dihay higayon nga gihuptan sa labing inila nilang mga sakop ang labing tag-as nga mga katungdanan sa nasudnong kagamhanan: Si Associate Justice Antonio Carpio naa pa sa Korte Suprema; si Simeon Marcelo maoy kanhi Ombudsman; ug si Cruz nahimong presidential legal adviser ug dayon defense secretary sa niaging lima na ka tuig.

Ang gahom nga gihuptan sa "The Firm" motidlom ra sab hinuon kon tinuod nga di na maayong ilang relasyon uban sa labing gamhanan nilang mga kliyente. Mosunod sila sa gidangatan sa ubang law offices nga mao say paborito sa nangaging mga pamunoan. Si Carpio pananglitan di nang kapaabot nga itudlo ni Pres. Arroyo puli sa moretiro nga si Chief Justice Artemio Panganiban human sa maisugon niyang pagbasura sa cha-cha.

Apan may alas silang gikuptan.

* * *

Silang Cruz, Carpio, Marcelo ug ang kapin sa 100 ka abogado sa "The Firm" maoy nagduma sa labing kontrobersiyal nga mga kaso sa mga Arroyo-sa gipasangil nga Jose Pidal accounts, sa ilang mga kabtangan sa San Francisco, California ug sa bag-o lang niulbo nga pasangil sa makabusdik nilang bank accounts sa Germany.

Kon tinuod nga nagkasungi nang mga Arroyo ug ilang mga abogado-mahimong tungod sa cha-cha, o mao na lang toy nakapaawas sa gantangan sa nagbuntaog nang mga diskontento (apil na si Marcelo nga gikatahong nibiya pagka Ombudsman kay gidid-an pagkiha sa mga kurakot nga suod sa presidente)-ang "The Firm" maoy labing madanihong kahimanan sa oposisyon batok sa pangu nga dugay na nilang gustong palayason.

Mao diay nga samtang gibalikas nang Justice Secretary Raul Gonzalez silang Cruz ug Carpio, tungod sa ilang pagbunyag nga taphaw ug pangilad ang cha-cha, si Pres. Arroyo mapailubon gihapong nihapuhap ni Cruz pinaagi sa pagpabilin niya isip adviser bisan mobiya na sa gabinete.

* * *

Email: [email protected]